OÉ-CUSSE, 17 janeiru 2024 (TATOLI) – Servisu Edukasaun Rejiaun Administrativa Espesiál Oé-Cusse Ambeno (RAEOA), daudaun ne’e identifika hela eskola sira-ne’ebé implementa kobra osan matríkula ba inan-aman hodi sosa uniforme ba estudante sira iha eskola.
Notísia relevante: EBC Palaban Oé-Cusse mantein osan matríkula $6.794 sosa uniforme
Diretór Edukasaun Oé-Cusse, Daniel Mauno, hateten, polítika IX Governu Konstitusionál, katak, komesa 2024 ne’e ba oin, uniforme ba estudante sira-ne’e, Governu liuhosi Ministériu Edukasaun maka prepara no fornese ba eskola sira iha territóriu nasionál.
“Polítika ida-ne’e, ita mós hetan sirkulár ofisiál hosi ministériu, husu ba eskola públiku sira atu labele halo kobransa ba inan-aman sira,” Daniel Mauno ba Agência Tatoli iha Oé-Cusse, tersa ne’e.
Tan ne’e maka iha Oé-Cusse, hahú semana kotuk ne’e, ekipa inspesaun tún ona ba eskola sira atu buka tuir, karik iha eskola balun la kumpre sirkulár ida-ne’e, ekipa sei haree nia prosesu, karik la prienxe kritéria ruma obrigatoriamente tenke devolve fila-fali, montante hira mós tenke devolve fila-fali ba inan-aman sira.
Tuir nia, daudaun ne’e iha ona eskola balu halo kobránsa, maibé liuhosi asina konkordánsia entre família ho eskola.
Nune’e to’o daudaun ne’e, parte edukasaun seidauk simu keixa ruma ka informasaun ruma liga ho kobransa osan iha eskola, maibé bainhira ekipa inspesaun verifika hetan iha terernu sei haree nia legalidade sira.
“Maibé iha akordu konkordánsia ho inan-aman sira, tenke asinadu mínimu 50+1, kuandu ida-ne’e laiha, tenke devolve fila-fali osan isra-ne’ebé kobra ona,” nia afirma.
Nia informa, sirkulár ofisiál ne’ebé fó sai hosi Ministériu Edukasaun vale de’it ba eskola públiku sira, ba eskola privada sira organiza jestaun rasik.
Notísia relevante: ME mak sei prepara uniforme ba alunu eskola públika sira
Jornalista: Abílio Elo Nini
Editór: Evaristo Soares Martins
