OÉ-CUSSE, 16 janeiru 2024 (TATOLI) – Eskola Bázika Centrál (EBC, sigla portugés) Palaban iha Rejiaun Administrativa Espesiál Oé-Cusse Ambeno (RAEOA) mantein kontinua uza osan matríkula hamutuk $6.794, ne’ebé rekolla hosi estudante sira atu sosa uniforme eskola nian.
Diretór Eskola Bázika Centrál (EBC, sigla portugés) Palaban, Alberto Soi, hateten, desizaun implementa tanba iha ona konkordánsia hosi inan-aman, kada estudante kontribui $43,00.
Maske nune’e, antes ne’e Governu liuhosi Ministériu Edukasaun Juventude no Desportu (MEJD) hasai ona sirkulár ida ba eskola públika sira iha territóriu nasionál atu labele rekolla osan hosi estudante atu sosa uniforme eskola, tanba Governu mak sei prepara uniforme.
“Maibé ami mantein, tanba ami enkontru ona ho inan-aman sira iha loron 08 janeiru 2024, inan-aman estudante, aseita no iha evidénsia asina konkordánsia, kada alunu ida kontribui $43,00 koloka ba uniforme kalsa ho faru $25,00, kaos $15,00, administrasaun dollar $1,00 no salaun kulturál $2,00,” Alberto Soi, ba Agência Tatoli iha Oé-Cusse, tersa ne’e.
Notísia relevante: ME proíbe eskola kobra osan hodi suku uniforme ba alunu sira
Albertu Soi, informa, desizaun rekolla osan matrikula hirka-ne’e la’ós segredu, la’ós kobransa ilegál ka obrigasaun maibé molok aplika, iha deskusaun aberta ho família estudante sira, kontribui ideia, ikus mai enkontru aseitadu, atu kontribui osan, tan ne’e maka implementa iha EBC Palaban.
Nia esplika, osan matríkula ne’e la’ós ba estudante EBC Palaban tomak, maibé ba estudante foun sira-ne’ebé foin mak rejista foun hamutuk na’in-158 ba ano letivu 2024 nian, ne’ebé osan ne’ebé rekolla hamutuk $6.794.
Nia fó ezemplu iha tinan 2022, Governu dehan labele kobra estudante sira, Governu mak sei prepara uniforme, maibé eskola kontinua la’o to’o fulan hira ona mós uniforme seidauk iha.
Entaun hosi eskola deside aplika ida-ne’e apoia hosi estudante hodi hola uniforme, nune’e bele koñese labrik sira, karak sira-ne’e eskola iha EBC Palaban, tanba loron-loron uza bainbain laiha uniforme.
Nia hatutan, situasaun ne’e agora mós hanesan, Governu dehan atu prepara, maibé to’o agora seiduak iha intevensaun atu oferese uniforme ka fa’an iha iha merkadu ka kompañia ruma suku para estudante sira bele ba hola.
“Horisehik segunda ensinu aprendizajen hahú ona, estudante sira seidauk iha farda eskola nian, entaun ida-ne’e difikulta tebes profesór sira, atu koñese labarik sira, tanba iha EBC Palaban estudante barak, eskola iha sorin mós iha, entaun presiza uniforme,” nia katak.
Notísia relevante:ME mak sei prepara uniforme ba alunu eskola públika sira
Entretantu, totál profesór hanorin iha EBC Palaban hamutuk na’in-23 komposta hosi pemanente na’in-18 no na’in-lima kontratadu no totál estudante hamutuk 526.
Jornalista: Abílio Elo Nini
Editór: Evaristo Soares Martins
