DILI, 19 Maiu 2025 (TATOLI) – Ema ho defisiénsia sira kontinua husu ba Governu, iha ámbitu Selebrasaun Aniversáriu Restaurasaun Independénsia ba da-23 ho tema “Hametin Paz no Dezenvolvimentu”, hodi aposta iha inkluzaun sosiál.
Nelson Xavier, ema ho difisiénsia fíziku, afirma katak importante tebes Ezekutivu tau prioriedade ba asuntu inkluzaun sosiál, liliu ema ho defisiénsia.
Tuir nia, instituisaun Estadu, privadu no eskola sira tenki garante asesibilidade ba ema ho defisiénsia. “Importante tebtebes tau mós prioridade iha asuntu inkluzaun sosiál, liliu ema ho difisiénsia, nune’e bele garante sira nia direitu tuir polítika nasionál ida ne’ebé inkluzivu”, hateten Nelson Xavier ba TATOLI, iha Dili.
Nia akresenta katak wainhira Timor-Leste atu kore-aan husi ki’ak, má nutrisaun no dezempregu, tenki hadia kualidade edukasaun, aposta iha área saúde ho agrikultura no setor produtivu sira. “Maibé, la’os uza polítika ida ne’ebé ses husi kumpromisiu no tau interese ódi no vigansa hodi kria dezigualidade sosiál”, dehan Nelson Xavier.
Ideia ne’ebé hanesan transzmite mós husi Natalino Tilman, ema ho difisiénsia motora. “Iha 20 Maiu, ita komemora Aniversáriu Restaurasaun Independénsia ba dala 23 ona, maibé dadaun ne’e ema ho difisiénsa barak mak sei dezenpregu hela. Tanba ne’e, ita-nia Estadu tenki tau importánsia ba asuntu referidu”, nia esplika.
Iha parte seluk, Noé de Araújo, ema ho difesiénsia Matan, apela ba Exekutivu, liliu ministériu relevante sira hodi envolve asosiasaun difisiénsia sira iha eventu boot sira hanesan Selebrasaun Aniversáriu Restaurasaun Independénsi atu kria kondisaun no preparasaun tuir nesesidade ema ho difesiénsia hotu ni’an.
“Governu bainhira atu halo programa ruma ka eventu ruma ida ne’ebé esensiál liu halo kooperasaun hodi halo rampa bazea ba medida ida ne’ebé mak ema ho difisiénsia matan bele asesu ho seguru”, nia esplika.
Notísia rlasionada:Pastor Lourenço: deputadu sira tenki kria unidade no promove fraternidade umana
Jornalista: Ivonia da Silva
Editora: Isaura Lemos de Deus
