DILI, 18 Juñu 2025 (TATOLI)-Prezidente Tribunál Rekursu, Afonso Carmona, informa pedidu husi partidu opozisaun sira ba fiskalizasaun abstrata ba Lei Organizasaun Judisiária númeru 4/2025, 28 Abríl, nia prosesu daudaun la’o hela iha tribunál.
“Kona-ba fiskalizasaun abstrata iha sistema prosesuál, distribui kazu, kuandu ema levanta, iha tribunál konsidera kazu. Tribunál halo nia serbisu, ne’ebé agora ha’u labele ko’alia juis nia serbisu ne’e, maibé ha’u la ko’alia kona-ba prosesu ne’e to’o desizaun. Ha’u ko’alia prosesu katak distribui tiha ona ba juis, tanba prosesu la’o hela, labele komentáriu”, nia dehan ba Tatoli iha Parlamentu Nasionál, ohin.
Nia esplika katak prosesu ne’e tuir prazu iha loron 30, maibé sei notifika parte relevante hodi fó resposta hafoin fó sai dezisaun.
“Buat ne’e tama, sei halo sitasaun lori tempu loron 30, resposta mai no sei notifika fali resposta. Husik nia la’o, ne’e mak demokrásia. Ita la’o tuir nia regra”, nia akresenta.
Relembra katak, iha 8 Maiu, Bankada opozisaun kompostu husi FRETILIN no PLP submete alterasaun Lei Organizasaun Judisiária ba Tribunál Rekursu hodi husu fiskalizasaun abstrata tanba tuir bankada iha alínea 2 husi artigu 76 A husi lei referida kontra prinsípiu Konstituisaun.
Notísia relevante: CNRT: Husik Tribunál mak deside fiskalizasaun abstrata ba Lei Organizasaun Judisiária
Jornalista: Nelson de Sousa
Editora: Maria Auxiliadora
