BOBONARO, 18 janeiru 2024 (TATOLI)-Governu liuhosi Sekretáriu Estádu Pekuaria, José Vieira de Araújo, kinta ne’e halo lansamentu vasinasaun animal asu, busa no lekirauk hodi halo prevensaun ba moras ka virus Raiva ‘Asu Bulak’ iha munisípiu Bobonaro.
Sekretáriu Estadu, José Vieira de Araújo, hateten, antes ne’e governu lansa ona programa refere iha Dili ho objetivu oinsá halo atu intervesaun sedu molok virus ‘Asu Bulak’ ne’e transmite mai munisípiu Bobonaro no territoriu nasionál.
Notísia relevante: Governu Austrália apoiu vasina raiva animál hamutuk doze rihun 200 ba MAPPF
Sekretáriu Estadu, José Vieira de Araújo, dehan, vasinasaun ne’e atu halo prevensaun, molok moras ne’e sai surtu ida ke boot hanesan Covid.
“Ne’e mak ita lansa program ida-ne’e, ita halo iha fronteira tanba ita-nia ema ilegál barak, animal mos ita kobre, entaun ita hakarak foti uluk iha pontu entrada sira, tanba ita iha nasaun viziñu, oras nia bele hakat mai hosi Indonézia, ita laiha kontrolu, entaun só vasinasaun de’it mak ita bele iha kontrolu,” nia informa hafoin lansamentu iha edifísiu, diresaun Servisu Munisipál Agrikultura, Munisípiu Bobonaro.
Nia parte horisehik halo vizita no ko’alia ho komunidade sira iha fronteira suku Batugade, postu administrativu Balibo dekalara katak durante ne’e asu kuaze 20 resin ona mak mate.
“Iha-ne’ebá asu hakilar de’it mate iha estrada, ha’u fó hanoin ba sira oinsá labele konsumu asu ne’e, tanba moras ne’e bele hada’et fali ba ema, entaun ho lansamentu ida-ne’e ita prepara sedu lais liu, tanba situasaun ida-ne’e sai ameasa boot ba ita, ne’e perigu la halimar,” nia alerta.
Diretór Jerál Pekuária hosi Ministériu Agrikultura, Pekuária, Peska no Floresta, Domingos Gusmão, husu komunidade sira koopera ho ekipa vasinadór sira,tanba moras Raiva konsege hamate ona asu no ema barak iha Kefa Indonézia.
“Ita Timor mós tenke halo prevensaun, liuliu munisípiu sira iha fronteira ne’e, tanba keta halo tama mai ita labele halo prevensaun, ne’e mak governu kolabora ho ajénsia sira hosi Australia suporta mai ita vasina, tanba moras ida anjing gila ne’e perigozu la halimar, entaun ita halo vasinasaun fronteira sira Oe-Cuse, Covalima no Maliana, tanba asu tama hosi li’ur barak,” nia informa.
Sekretáriu Autoridade Munisípiu Bobonaro, João de Fátima do Carmo, sublima, fasil tebes moras ne’e atu hada’et mai Timor-Leste tanba Bobonaro hanesan munisípiu ida-ne’ebé fronteira terrestre ho Nusa Tenggara Timur (NTT), Indonézia.
“Ami presiza duni halo vasinasaun hodi halo prevensaun ba moras sira-ne’ebé daudaun ne’e atu hada’et mai to’o ita-nia komunidade sira no ita-nia animal sira ne’ebé mak ita-nia animal hakiak,” nia katak.
Tuir dadus ne’ebé iha ekipa vasinadór ne’ebé destakadu iha munisípiu Bobonaro hamutuk 24 ne’ebé sei halo vasinasaun kobre suku sira liña fronteira pertense ba postu administrativu Balibo, Maliana no Lolotoe.
Notísia relevante: Autoridade Bobonaro husu abitante sira labele sosa asu ilegál hosi Atambua
Jornalista: Sérgio da Cruz
Editór: Evaristo Soares Martins
