BOBONARU, 24 Juñu 2026 (TATOLI)-Komisaun Organizadora enserra eventu desportu komunitáriu ho modealidade futeból, Maratona, halai karón no hana-kalik iha postu administrativu Maliana, Munisípiu Bobonaru.
Modalidade futeból klube Malbek mak sai vensedór hafoin halakon nia adversariu Hultopol, liuhusi drama suta penalidade.
Molok enserra atividade desportu komunitáriu, Komisaun Organizadora hamutuk ho jogadór no adeptu sira fó minutu silénsiu ida ba maktoban antigu Prezidente Repúblika, Fransisco Guterres “Lú-Olo” hodi fó onra no gloria ba ninia kontribuisaun ba luta libertasaun nasionál no ba dezenvolvimentu Timor-leste.
Sekretáriu-Jerál Asosiasaun Futeból Bobonaru (AFB), Rosalino Loe Leso, apresiza tanba liu husi eventu desportu komunitáriu bele hetan fini jogadór sira iha baze.
Notísia relevante: Klubu futeból sanulu harame Maliana liuhusi desportu komunitáriu
“Programa ne’e povizitu tebes tanba ho kompetisaun ida hanesan ne’e mak ita atrai joven sira atu idaidak hanoin ona kaderiza nia-an hodi prepara sira-nia rekursu atu kompete iha klubu ba nivel postu administrativu, munisípiu, to’o nasionál”, nia informa ba jornalista sira, hafoin enserra eventu ne’e iha kampu futeból Maliana.
Prezidente Konfederasaun Desportu Timor-Leste (CDTL) Munisípiu Bobonaru, Mário Soares, apresia ho jogadór no foinsa’e sira ne’ebé partisipa iha eventu ne’e no enkoraja atu nafatin treinu ho disiplina nune’e bele kompete iha eventu sira tuirmai.
“Ohin imi hatudu ona talentu di’ak, joga ida tinan ne’e di’ak liu ho tinan hirak liubá, tanba laiha problema. Atividade ne’e la hotu iha ne’e tenke prepara imi nia-an, redús tiha buat ne’ebé la liga ho imi-nia talentu ne’e, tua ho sigarru ne’e lalika. Depois evita tiha buat ida tuur iha estrada ibun to’o kalan-boot, para imi-nia saúde ne’e di’ak”, nia dehan.
Prezidente Komisaun Organizadora Desportu Komunitáriu postu administrativu Maliana, António Santa Cruz, relata katak durante ne’e eventu referida la’o ho ambiente dame, hakmatek no nakonu ho espíritu desportivu.
“Durante jogu simu malu iha kampu laran iha, maibé la hatudu atitude ne’ebé la di’ak. Adeptu sira hakilar normál, ita-nia eventu la’o ho di’ak to’o remata”, nia salienta.
Biban ne’e, Xefe Suku Holsa ne’e mós orienta klube Malbek atu labele selebra vitória ho aktividade komboiu no haklalak iha espasu públiku tanba Estadu dekreta hela lutu nasionál ba falesimentu antigu Xefe Estadu, Fransisco Guteres “Lú Olo”.
“Ita iha hakmatek ninia laran, loloos feriadu nasionál karik ita-nia eventu ne’e ita muda, maibé lutu de’it, entaun eventu hotu-hotu ita-nia Governu la taka atividade, bele la’o, maibé ho ambiente silénsiu atu fó omenajen ba ita-nia eroi nasionál ne’e”, nia salienta.
Iha enserramentu ne’e, komisaun organizadora mós entrega tasa no osan ba klubu futeból vensedór dahuluk, daruak, no datoluk. Entrega mós prémiu ba modalidade tolu seluk.
Atividade desportiva ne’e ho objetivu atu komemora Loron Restaurasaun Independénsia, 20 Maiu, ba da-24 hodi fó oportunidade ba joven sira hatudu sira-nia talentu iha área desportu.
Eventu ne’e organiza husi suku Holsa ho montante orsamentu hamutuk $3.500 ne’ebé hetan apoiu husi MJDAK.
Aktividade ne’e hetan mós apoia seguransa husi Polisia Nasionál Timor-Leste, eskuadra postu administrativu Maliana no asisténsia primeiru sokorru husi Krús Vermella Timor-Leste filiál Maliana.
Notísia relevante: Desportu komunitária iha Bobonaro, golu úniku Jay Soares lori Oe-Leu A hakat ba finál
Jornalista: Sergio da Cruz
Editora: Maria Auxiliadora
