BOBONARO, 05 marsu 2022 (TATOLI) – Kooperasaun bilaterál no multilateral sai programa prinsipál ba kandidatu Francisco Guterres ‘Lú Olo’ bainhira povu kontinua fó fiar iha eleisaun prezidensiál 19 marsu tinan ida-ne’e.
Asuntu internasionál rua ne’e kandidatu Prezidente Repúblika Francisco Guterres ‘Lú Olo, akompaña hosi Sekretáriu Jerál Partidu FRETILIN, Mari Alakatiri, sábadu ne’e perante ba apoiante no militante liuhosi komísiu iha kampu futeból Maliana, munisípiu Bobonaro.
“Bainhira ha’u eleitu hakarak kaer-metin nafatin relasaun bilaterál no bilaterál ho rai ne’ebé de’it atubele hametin kooperasaun ba oin, iha pontu estratéjiku ida-ne’ebé ke boot tebes ba Timor-Leste ho ninia pozisaun jeografika oras ne’e, ita sai hanesan ponte hosi pasífiku mai fali Ázia,” nia katak.
Kooperasaun bilaterál nu’udar tipu relasaun internasionál ne’ebé envolve parte rua. Bainbain refere ba kooperasaun entre nasaun rua iha área polítika, kulturál no ekonomia. Kooperasaun multilaterál nu’udar tipu kooperasaun internasionál ne’ebé envolve liu nasaun rua.
Lú Olo promete bainhira povu fó fiar sai xefe estadu dala-ida tán sei hametin relasaun bilaterál no multilaterál ho nasaun viziñu sira iha ASEAN no membru CPLP sira.
Nune’e mós iha Amérika Látina hanesan Brazil no iha kontenente Europa mak Portugál nu’udar nasaun maun no alin.
Bainhira Lú Olo eleitu ba Prezidente Repúblika sei fó atensaun ba kooperasaun bilaterál no multilaterál nune’e labele kria konflitu.
Tanba ne’e Lú Olo kompromete sei serbisu ho Governu no Parlamentu Nasíonál hodi apoia Ministériu Negósiu Estranjeiru no Koperasaun (MNEK ) atubele serbisu maka’as hodi kria relasaun diplomásia ho nasaun viziñu sira, nune’e Timor-Leste bele tama lalais membru permanente ASEAN.
Sekretáriu Jerál Partidu FRETILIN, Mari Alkatiri, reforsa, Lu-Olo nu’udar kandidatu únika hosi FRETILIN tanba ne’e husu ba militante sira iha munisípiu Bobonaro atu serbisu maka’as iha baze hodi lori Lú Olo dala-ida tán asume xefe estadu.
Iha parte seluk, Prezidente Partidu Os Verdes de Timor, António Lela Huno, husu militante sira iha munisípiu Bobonaro, atu apoia Lú Olo iha eleisaun prezidensiál.
“Ha’u husu ba militante sira-ne’ebé hakarak tuir ha’u, imi hotu tenke serbisu maka’as liután hodi halo ita-nia aman Lú Olo manán iha primeira ronde iha rai Bobonaro,” nia katak.
Jornalista : Sérgio da Cruz
Editór : Evaristo Soares Martins
