DILI, 30 janeiru 2024 (TATOLI)—Membru Parlamentu Nasionál (PN) liuhosi Deputada bankada CNRT, Cedelízia dos Santos ho Deputada hosi bankada FRETILIN, Cristina Rebelo, husu ba Ministériu Justisa (MJ) atu ba renova timoroan sira-nia pasaporte ne’ebé kaduka iha Portugál.
Deputada CNRT, Cedelízia dos Santos, hateten foin daudaun nia-parte hala’o vizita ida ba Portugál halo enkontru ho joven timoroan ne’ebé serbisu iha ne’eba, inklui estudante timoroan sira barak aprezenta ho problema pasaporte kaduka.
“Estudante sira problema ho pasaporte, sira atu fila ba mai tikete karun no bainhira sira-nia pasaporte atu mate talves tama exame. Tan ne’e, ami husu ba Ministériu Justisa, hanesan iha orsamentu tinan ne’e atu tau adidu iha portugál, hanoin se bele ho lalais,” Deputada hosi bankada Governu ne’e levanta liuhosi reuniaun plenária PN, tersa ne’e.
Aleinde ne’e, membru hosi órgaun lejislativa ne’e husu Ministériu Negósiu Estranejiru no Kooperasaun (MNEK) atu tau atensaun ba funsionáriu sira-ne’ebé destaka iha Portugál, tanba tuir informasaun ne’ebé iha funsionáriu sira simu saláriu kiik tebes kompara ho kustu vida karun iha Portugál.
Deputada FRETILIN, Cristina Rebelo, mós husu Governu atu tau atensaun ba renovasaun pasaporte ba sidadaun timoroan sira-ne’ebé daudaun ne’e servisu ka eskola iha estranjeiru.
“Ha’u simu informasaun hosi estudante sira iha Portugál no mós Inglaterra, agora daudaun hasoru hela difikuldade boot bainhira atu rejistu sira-nia estudu, tanba ho problema pasaporte,” nia dehan.
Tuir nia, informasaun nseluk katak embaxada Timor-Leste iha Portugál mós laiha kondisaun tanba fatin la to’o atu bele simu ekipa hosi Ministériu Justisa hodi estabelese sira-nia gabinete iha embaxada, maibé iha informasaun katak iha ona adidu justisa no hein de’it atu dezloka ba Inglaterra
Liuhosi sesaun plenária, Vise Ministru ba asuntu Parlamentár, Adérito Hugo da Costa, rejista preokupasaun Deputadu sira-nian no sei enkamiña ba ministériu tutela.
Jornalista : Nelson de Sousa
Editór : Cancio Ximenes
