DILI, 30 junu 2023 (TATOLI)—Diretór Ezekutivu Interinu Asosiasaun Halibur Defisiénsia Matan Timor-Leste (AHDMTL), Gabriel Ponciano, hateten maske MSSI ho AHMDTL asjna ona akordu iha 2023 ne’e maibé Ministériu Solidariedade Sosiál no Inkluzaun (MSSI) seidauk transfere osan $54.000 ba AHDMTL.
“Ami hetan apoiu osan hosi ISS hamutuk $54.000 hodi hala’o programa no atividade AHDMTL nian durante tinan ida, liuliu fó formasaun kona-ba letra braille nian ba ema ho defisiénsia matan,” nia hateten iha AHDMTL, Manleuana, sesta ne’e.
Nia hateten, osan ne’e la sufisiente ba atividade AHDMTL nian tanba MSSI liuhusi ISS koa sai osan advokásia nian ba komunidade iha rurál inklui osan peskiza nian.
“Dahuluk ha’u lamenta ho ida-ne’e tanba apoiu ne’e la reflete ba nesesidade ema ho defisiénsia iha territóriu nasionál,” nia hateten.
Nia hateten, AHDMTL hatama proposta ba MSSI hamutuk $80.000 maibé ko’a sai tiha hodi halo perdiem ba funsionáriu MSSI nian.
“Osan koa tiha depois sira seidauk transfere to’o agora, no sira fila ezije relatóriu mak hafoin transfere osan. Ida-ne’e ita lamenta tanba tarde ona agora razaun fali ho relatóriu. MSSI presiza hadi’a sistema ne’e,” nia rekomenda.
Diretór Nasionál Orsamentu Jestaun Finansa no Patrimoniál MSSI, Jimmy Valente de Orleans dos Reis, hateten apoiu ba Institutu Solidariedade Sosiál (ISS) mós la’o hela no nia alokasaun osan miliaun $1.4 ba instituisaun 28.
Hosi osan ne’e, nia dehan, seidauk aloka ba organizasaun sira tanba sira sei dezeña akordu nune’e entrega ba MSSI nune’e bele transfere osan.
“Ha’u hanoin dentru semana ne’e sira hatama ona akordu, nune’e ita haruka ona osan tanba liu fulan neen ona. Tanba, baibain neen fulan neen tenke haruka ona osan maibé ba tinan ne’e seidauk tanba sira seidauk hatama dezena akordu,” nia hateten.
Jornalista : Osória Marques
EDitór : Cancio Ximenes
