DILI, 01 Fevereiru 2025 (TATOL)- Prezidente Federasaun Futeból Timor-Leste (FFTL), Nilton Telmo Gusmão, klarifika deside halo deskualifikasaun hasoru klube futeból Bobonaro iha Jogu semi finál Kopa Juvenil sub-15 tinan 2024 tanba komisaun deteta falsifika dokumentu ba jogadór na’in-rua.
¨Sim, klaru klubu adversáriu sira (Baucau) mak aprezenta evidénsia. Evidénsia hatudu Billete Identidade labarik sira ne’ebé iha klube Bobonaro hatama ne’e sira scan tiha mak sira edita tiha data moris labarik sira nian ne’e. Alende ne’e Asosiasaun Futeból Baucau ba buka tuir informasaun ne’e to’o iha Notáridu no deskobre katak buat sira ne’e iha falsifikasaun duni. Nune’e ita la tolera no deskualifika kedan. Iha ha’u nia tempu la permite ida-ne’e¨, Prezidente F-FTL, hateten ba jornalista sira hafoin partisipa jogu finál kopa Juveníl Sub-15 tinan 2024 iha estádiun munisipál Dili, Sábadu ne’e.
Nia esplika, falsifikasaun ne’ebé komete husi Asosiasaun Futeból Bobonaro mak ba hamenus fali jogadór na’in rua tinan to’o 18, maibé muda fali ba tinan 15 hodi bele partisipa Kopa referidu.
“Ita joga ne’e sub-16, se labarik atinje ona tinan 18 nia labele joga, mas sira halo labarik ne’e nia tinan tun fali ba idade 15, ne’e faktu sira ne’ebe mak deskobre no tenke deside hasai tanba ita hakarak hadi’a ita nian futeból”, nia lamenta.
Tanba, Tuir nia, durante ne’e falsifikasaun dokumentu jogadór nia ne’e hahú husi klube ka asosiasaun futeból sira ho nian impaktu mai to’o selesaun nasionál.
Nilton Gusmão dehan ema balun hatete nusa mak to’o tiha finál mak foin hatene hodi halo deskualifikasaun ba klubu Bobonaro
¨Sim ami to’o finál mak ami hatene, tanba finál mak jogu iha ne’e. Enkuantu jogu faze apuramentu ne’e iha munisípiu. Tanbe ne’e kuandu mai iha ne’e federasaun labele tolera buat sira hanesan ne’e¨, nia esplika.
Prezidente ne’e afirma tan katak deskualifikasaun la’ós halo de’it ba Asosiasaun Futeból Bobonaro, maibé halo mós ba Asosiasaun Futeból Liquiça no Ermera tanba komete mós falsifikasaun dokumentu ba jogadór sira.
¨Tuir loloos Asosiasaun Futeból Liquiça no Ermera mak mai joga iha semi finál ne’e, maibé tanba deskobre dadus ne’ebé falsifikadu, entaun ita deskualifika hotu kedan sira¨,nia haktuir.
Ho situasaun ne’e, nia husu Asosiasaun Futeból sira atu labele halo falsifikasaun dokumentu ka inveta ou hamenus idade jogadór sira tanba fó impaktu ba dezenvolvimentu futeból iha Timor-Leste.
¨Tempu ona para ita atu hadi’a buat sira ne’e, se ita atu husik kontinua mosu falsifikasaun ba jogador nia tinan bainhira mak ita atu hadi’a ita nian federasaun no halo dezenvolvimentu futeból iha Timor-Leste,”nia apela.
Komisaun deskualifika klube tolu
Prezidente Komisaun Organizadora Kopa Juveníl sub-15 tinan 2024, Frederico Martins, relata konsege deskualifika klubu futeból tolu husi Munisípu Liquiça, Ermera no Bobonaro tanba komete falsifikasaun dokumentu ba jogadór sira.
¨ Ita halo investigasaun no ita konsege deteta iha jogadór na’I rua husi Bobonaro mak falsifika tinan hanesan ida moris 2005, maibé nia muda nia Billete Identidade ba fali 2009 ida seluk moris iha 2008, maibé muda ba 2009. Nune’e mós kazu hanesan husi Liquiça no Ermera, entaun ita deside deskualifika sira¨, nia esplika.
Tuir kritéria rejistu jogadór ba partisipa Kopa ne’e mak jogadór sira ne’ebé moris iha loron 1 Janeiru 2009.
Diskualifikasaun ne’e bazea ba regulamentu Kopa Juveníl no federasaun nian tanba molok jogu la’o komisaun introdús ona regulamentu ba partisipante jogu sira katak se mak falsifika dokumentu mak deteta komisaun sei rekomenda ba federasaun atu halo deskualifikasaun.
Notísia relevante:Klube husi Manufahi sai kampiaun iha Kopa Futeból Juveníl U15
Jornalista: Natalino Costa
Editór: Florencio Miranda Ximenes
