VIKEKE, 12 Marsu 2026 (TATOLI)—Administradór Postu Administrativu Lakluta, Munisípiu Vikeke, Pascoal Gama Martins, informa projetu reabilitasaun estrada kilómetru 14 husi Luka Rai-Hun bá to’o Postu Lakluta daudaun ne’e iha progresu.
“Durante ne’e, ami akompaña obra reabilitasaun estrada husi Luka Rai-Hun to’o Postu Lakluta Vila, ami haree servisu la’o di’ak tebes tanba loron-loron ita-nia traballadór sira servisu hela konstrui ezgotu no barajen,” Pascoal Gama Martins ba TATOLI iha Postu Vikeke Vila, Kinta ne’e.
Autoridade Lakluta ne’e hatutan maski sira servisu la’o di’ak, maibé fatuk mak sai difikuldade ba empreza implementadór sira tanba fatuk hada ba ezgotu ne’e tula husi mota Dilór, nune’e kuandu udan mota tun sira labele halo servisu.
Nia iha esperansa katak kuandu estrada ida-ne’e konkluidu sei fasilita tebes populasaun Lakluta nia movimentu tanba durante ne’e estada mak sai hanesan difikuldade ba povu Lakluta.
Notísia relevante: PM Xanana lansa fatuk dahuluk ba reabilitasaun estrada diresaun Luka-Lakluta
Iha fatin ketak, Koordenadór Infraestutura Ministériu Obra Públika (MOP) Munisípiu Vikeke, Mário Ângelo Menezes relata, reabilitasaun obra pakote rua husi Luka Rai-Hun bá Postu Administrativu Lakluta implementa husi empreza rua hanesan Empreza Kimberlie responsabiliza ba kilómetru hitu (7), atinji ona 6,86 % no Empreza Hoven II responsabiliza kilómetru hitu (7) ne’ebé atinje ona 3,09%.
“Empreza daudaun ne’e konstrui hela mak hanesan barajen, ezgotu inklui preparasaun estrutura estrada nian. Tuir loloos servisu la’o lalais. Problema ne’ebé mak empreza enfrenta mak fatuk. Durante ne’e, empreza sira tula fatuk iha Dilór. Kuandu kondisaun udan sira labele ultrapasa mota Uelolo. Maibé, ita-nia empreza halo ona koordenasaun ho rai-na’in sira iha Postu Lakluta para halo esplorasaun fatuk iha Postu Lakluta hodi oferese ba estrada pakote rua referidu,” nia esplika.
Entretantu, projetu ne’e Ministru Obra Públiku (MOP), Samuel Marsal asina direta ho empreza responsavel rua. Ba reabilitasaun Lot A, STA 0+00-STA 7+00, kontratu SSS/135/MOP-2025, sei gasta $4.000.215,67, husi Kimberlie konstrusaun Unip, Lda. Enkuantu, ba Lot B, STA 7+00STA 134+922.67, kontratu SSS/136/MOP2025, sei gasta $3.494.938,50, responsabiliza husi Empreza Hoven Il Unip, Lda, durasaun servisu tinan ida, hahú 04 Outubru 2025 no sei ramata iha 04 Outubru 2026.
Jornalista: Vitorino Lopes da Costa
Editór: Xisto Freitas da Piedade
