DILI, 21 Jullu 2025 (TATOLI)-Servisu Migrasaun permite ona sidadaun Indonézia, Safi’i Kemamang, tama Timor-Leste ho asinatura deklarasaun ida katak tenke kumpre lei migrasaun no azilu mak la envolve-an iha atividade polítika no prátika polítika.
“Sim, foin daudaun migrasaun autoriza ha’u tama fali Timor-Leste, sira haruka ha’u asina deklarasaun ida katak labele viola ba lei migrasaun. Deklarasaun, ne’ebé hau asina ne’e labele envolve-an iha atividade polítika prátika”, Safi’i Kemamang hatete ba jornalista Tatoli iha nia rezidénsia Osindo III, horisehik.
Safi’i Kemamang hetan fali autorizasaun husi servisu migrasaun iha fronteira Batugade, iha loron sábadu (19/7) hodi hamutuk fali ho família (feen ho oan sira) iha Timor-Leste.
Notísia relevante : PDHJ husu MI anula desizaun bandu Safi’i Kemamang tama Timor
Nia dehan, hanesan dosente iha Fakuldade Siénsia Sosiál no Umaniora, Universidade da Paz (UNPAZ), dalaruma halo formasaun polítika ba estudante sira, maibé halo polítika ne’e laiha realidade.
Preokupasaun seluk ne’ebé nia duvida mak hanesan dosente ba matéria siénsia polítika, iha prosesu aprendizajen mosu oinsá mak rezolve kestaun polítika no análiza ba asuntu polítiku, serake ida-ne’e parte ida husi prátika polítika.
“Husi atividade prátika politiku ida-ne’e mak nu’udar indikadór ida katak ha’u prátika polítika, depois bandu ha’u. Di’ak liu fakuldade siénsia polítika taka tiha de’it iha universidade”, mane-foun Lospalos ne’e afirma.
Servisu Nasionál Intelejénsia nia konsiderasaun hasoru nia nu’udar autór ba movimentu ne’e mak efeitu husi bandu durante semana-ida hela iha fronteira Indonézia. Tanba ne’e, dala-ida tán Safi’i rejeita envolvimentu iha movimentu balun hodi influénsia estudante universitáriu sira ko’alia no halo asaun solidariedade kona-ba Papua nia independénsia.
“Atividade husi joven sira ne’ebé mak ko’alia kona-ba Papua, duun mai ha’u katak ha’u mak organiza, ne’e laloos no la justu. Imi bele haree husi ha’u nia atividade sira no iha ha’u nia facebook, ha’u nunka temi Papua merdeka”, ativista Indonézia ne’e adianta.
Safi’i haktuir, momentu Servisu Migrasaun la fó nia tama mai teritóriu nasionál tanba orientasaun husi leten. Maibé asuntu ne’e nia konsidera liu ona, nia lakohi ko’alia tán maske ema barak mak halo kontaktu inklui mídia, agora mak hakarak ko’alia ho jornalista Tatoli hafoin governu autoriza nia tama fali Timor-Leste.
“Servisu Intelejénsia Timor-Leste presiza hadi’a-an, rekolla dadus depois analize mak halo asaun. Ha’u nia kazu ne’e hanesan traballu kaza ba ita hothotu no lisaun mai ita hothotu”, nia fó-hanoin.
Nia agradese ba joven rezisténsia ne’ebé fó ona apoiu bainhira la tama mai Timor-Leste. “Ha’u agradese ba kolega sira joventude rezisténsia sira ne’ebé hatudu duni sira-nia solidariedade mai ha’u, to’o fila fali mai”.
Nia mós agradese ba Governu ne’ebé autoriza fali nia tama mai Timor-Leste.
Notísia relevante: Governu klarifika razaun proibisaun ba Safi’i Kemamang tama Timor-Leste
Jornalista : Natalino Costa
Editora : Rita Almeida
