DILI, 03 maiu 2023 (TATOLI) – Diretór Armazenamentu no Distribuisaun Servisu Autónomu Medikamentu Ekipamentu Saúde (SAMES),Octavio Fernandes, informa akizisaun ba aimoruk 2023 nian prosesu lao ona.
“Daudaun ne’e SAMES halo ona kompras ba aimoruk 2023 nian tanba antes ne’e ita problema ho lei aprovizionamentu nian maibé ita-nia prosesu la’o ona, espera bele to’o lalais hodi atende ba pasiente sira”, Octavio Fernandes informa iha nia kna’ar fatin Kampu Alor.
Nia informa, porsesu akizisaun la’o hela bainhira aimoruk mai bele responde ba fasilidade saúde sira hodi halo tratatmentu ba pasiente sira.
Iha fatin hanesan, Diretór Aprovizionamentu SAMES, Nelson Correia, dehan prosesu akizisaun produtu medikamentus ba tinan ida ne’e la’o ona no iha kompaña 23 mak manan ba konkursu ida ne’e.
“Ita-nia akizisaun ba produtu medikamentu ba tinan ida ne’e lao ona, ita iha kompaña hamutuk 23 mak manan ba konkursu ida ne’e maibé balun asina ona balun sei konfirma fila fali presu tanba kuantidade presu la hanesan”, nia esplika.
“Ba aimoruk kosumaveis no aimoruk fuan nian, ita kobre ho kompaña ida de’it iha mós produtu balun kompras direta ho fábrika sira hanesan soru been, dekstrose, dekstra ho soru talin sosa direta husi fábrika iha indonézia. Iha mós kabas suku ba isin husi laran hanesan foin partus hotu, operasaun hotu, ida ne’e halo kontratu ho kompaña India”, nia relata.
Kompaña ne’ebé manan ba konkursu ne’e husi Indonézia, Holanda Austrália, Singapura india, normalmentu SAMES fó kontratu 60-90 dias, aimoruk foin to’o mai Timor-Leste maibé depende ba prosesu deliberasaun no situasaun sira.
Orsamentu ne’ebé mak SAMES prevé hodi halo akizisaun ba aimoruk iha 2023 ne’e ho montante hamutuk $ 3.7 millaun. No orsamentu rasik la sufisiente atu kompras tanba tuir nesesidade ne’ebé SAMES iha boot tebes.
Aleinde ne’e, Octavio Fernandes, informa estoke aimoruk daudaun ne’e sufisiente iha Armazem SAMES.
“Ita-nia estoke aimoruk daudaun ne’e sufisiente hela, ita-nia fatin, ita iha totál aimoruk sira ne’ebé mak iha hamutuk 443 item, husi ne’e aimoruk vitál, esensiál no nesesáriu”, Octavio Fernandes informa.
Nia dehan, aimoruk vitál ho totál item 106, husi ne’e aimoruk ne’ebé mak disponével hamutuk 88 no aimoruk ne’ebé mak estock out hamutuk 18. Agora aimoruk esensiál estoke aimoruk hamutuk item 230, husi ne’e estoke ne’ebé mak iha 178 no item 52 mak la iha.
Aimoruk nesesáriu ho totál 107, husi ne’e item ne’ebé mak disponível hela hamutuk 92 no 15 item mak la iha.
“Aimoruk vitál ne’e ita uza ba kazu emerjénsia sira hanesan inan sira atu partu presiza aimoruk sira ne’e agora aimoruk nesesáriu no esensiál hanesan paracetamol ne’e ita uza ba isin manas nian atu bele redúz isin manas sira ida ne’e mak durante ne’e ita iha”, nia informa.
Tanba ne’e, nia husu ba diretór nasionál no munisípiu sira atu halo pedidiu mai SAMES hodi halo distribuisaun aimoruk ba kada fasilidade sira.
“Ami husu ba diretór nasionál sira no munisípiu sira hodi halo pedidu mai SAMES atu bele distribui aimoruk ba kada fasilidade saúde”, nia konklui.
Jornalista : Felicidade Ximenes
Editór : Zezito Silva
