DILI, 25 jullu 2022 (TATOLI)–Sekretária Estadu Igualdade no Inkluzaun (SEII), Maria do Rosario Fátima, hateten SEII kontinua enkoraja feto Timor-Leste atu partisipa iha eleisaun parlamentár 2023, eleisaun suku no eleisaun munisipál.
Notísia Relevante: SEII sei motiva feto portadora defisiénsia kompete iha eleisaun xefe suku
“Ita enkoraja feto sira, nune’e partisipa iha eleisaun sira iha tinan oin, hanesan eleisaun parlamentár, eleisaun suku no eleisaun munisipál,” Maria do Rosario Fátima hateten ba Agência TATOLI, iha serimónia SEII hala’o enkontru ho feto potensiál sira hosi Munisípiu 12 inklui RAEOA, iha Delta Nova, Comoro, Dili, segunda ne’e.
SEII nafatin halo advokásia ba iha munisipál sira hodi halo preparasaun no oinsá bele kompete mós ho mane sira ba eleisaun sira tuir mai.
Tuir SEII nia haree, partisipasaun feto ba iha vida pólitika katak feto balun tauk tanba kultura, entaun ida-ne’e mak halo sira la brani hodi foti desizaun atu mout iha mundu polítika.
“Maibé iha feto balun kandidatu an maibé ema mak la hili sira. Tanba ida-ne’e mak ita agora daudaun ne’e, ita iha feto potensiál iha munisípiu 12 iklui RAEOA no ita mós iha sentru empoderamentu hodi tau forsa hamutuk, atu enkoraja feto maluk sira atu partisipa iha vida polítika no eleisaun sira,” nia dehan.
Antes ne’e, asuntu ida-ne’e hosi Primeiru Governu no VIII Governu Konstitusionál kontinua promove no halo advokásia liuhosi ninia planu no estratéjia kontinua halo advokasia, hodi promove feto atu bele partisipa iha setór ekonomia, sosial, polítika no seluk tán.
“Ita kontinua fó advokasia ba maluk feto sira, la’ós foin hahú iha VIII Governu Konstitusionál maibé hahú kedan iha Governu dahuluk-nian. Ita halo buat barak ona hodi asegura feto iha aspetu hotu liu-liu iha prosesu dezenvolvimentu,” Sekretária Estadu Igualdade no Inkluzaun (SEII) sesante, Maria José da Fonseca Monteiro de Jesus, hateten.
Oras ne’e daudaun SEII kontinua dezenvolve programa sira-ne’ebé estabelese ona iha Governu dahuluk-nia hanesan halo empoderamentu ekonómiku no fó advokasia ba feto maluk sira atu asegura sira-nia partisipasaun feto iha vida polítika no foti desizaun.
Notísia Relevante: Grupu empoderamentu ekonomia feto 384 rejistu ona iha SEII
Jornalista : Osória Marques
Editór : Cancio Ximenes
