VIKEKE, 14 Abril 2026 (TATOLI) – Xefe Suku Uma Ki’ik, Postu Administrativu Vikeke Vila, Munisípiu Vikeke, Claudino Amaral, informa katak iha tinan 2026 suku Uma Ki’ik sei hetan uma dignu hamutuk 25.
“Iha tinan ida-ne’e ami sei hetan uma dignu hamutuk 25 ba abitante sira iha suku Uma Ki’ik. Kona-ba prosesu implementasaun nian, foin lalais ne’e ekipa husi Ministériu Dezenvolvimentu Rurál no Abitasaun Komunitária (MDRHK) mai rekolla ona dadus husi benefisiáriu sira,” dehan Claudino Amaral ba TATOLI, I.P., iha Postu Vikeke Vila, ohin.
Autoridade komunitária ne’e hato’o katak ekipa MDRHK sei mai tan dala ida atu identifika fatin ba konstrusaun uma dignu, inklui verifika rai ba konstrusaun no haree asesu dalan ba fatin ne’ebé sei halo konstrusaun, depois mak tama ba faze konstrusaun.
“Konstrusaun uma dignu iha faze dahuluk sei konsentra iha aldeia rua, mak hanesan Aldeia Makadehan (uma 7) no Aldeia Ainauai (uma 18). Entaun, uma-kain 25 mak sei hetan uma dignu,” nia esplika.
Claudino hateten karik iha futuru mak programa ne’e sei kontinua, entaun sei oferese ba aldeia seluk.
Nia reiteira katak bainhira ekipa sira mai fali, sei tun direta ba aldeia rua ne’e atu halo sosializasaun programa ne’e ba komunidade sira, atu sira komprende katak iha future, uma dignu sei selu bazeia ba rendimentu família, no kada fulan sei selu $50.
“Tan ne’e, ita presiza halo sosializasaun ba ita-nia komunidade sira atu komprende prosesu konstrusaun uma dignu, hafoin ita implementa,” Claudino salienta.
Nia esplika katak uma dignu iha tipu rua ho medida lahanesan. Medida ida mak metru 7×9 ba família vulnerável ne’ebé la presiza selu, enkuantu uma ho medida metru 9×13 sei selu $50 kada fulan.
Jornalista: Vitorino Lopes da Costa
Editór: Filomeno Martins
