DILI, 24 outubru 2024 (TATOLI)—Ekipa husi Universitas Pembangunan Nasional (UPN) Veteran, iha Jogjakarta, Indonézia hasoru malu ho reprezentante sira husi Ministériu Edukasaun (ME), hodi hato’o intensaun halo kooperasaun iha área dezenvolvimentu rekursu umanu no rekursu naturál iha Timor-Leste.
“Pontu importante ne’ebé ohin ko’alia iha enkontru ne’e maka ami hakarak serbisu hamutuk atu haforsa malu entre nasaun rua ne’e, liu-liu iha área dezenvolvimentu rekursu umanu. Tanba UPN mós iha kompetisaun atu hanesan Timor-Leste nian, enkuantu Timor-Leste iha poténsia ba dezenvolvimentu rekursu naturál, ezemplu mina, óleu no gás, mineiru, karvaun. Ida-ne’e ami prontu dezenvolve jerasaun foun Timor-Leste,” Reitór UPN Veteran Jogjakarta, Mohamad Irhas Effendi, informa ba jornalista sira, hafoin enkontru ho Sekretáriu Estadu Ensinu Sekundáriu Jerál no Ensinu Tékniku Vokasionál, Domingos Lopes Lemos, iha salaun VIP ME, Vila-Verde, kinta ne’e.
Notísia relevante : Filipina komprometidu apoia Timor-Leste iha dezenvolvimentu rekursu umanu
Nune’e, nia hein bele konkretiza planu ne’e ho realizasaun akordu ida iha tempu badak, nune’e bele implementa kompromisu nasaun rua.
“Ami sempre tau importánsia, ami prontu atu vizita no hein katak akordu ne’e sei mai uluk iha tempu badak, maibé importante liu la’ós de’it akordu ne’e maibé mós implementasaun programa hanesan kompromisu ida atu nune’e bele realiza lalais. Tanba prosesu simu estudante foun, nune’e esforsu akordu ne’e sei finaliza atu nune’e iha fulan-fevereiru ita bele selesiona independentemente. Loloos ne’e, ita buka senáriu tolu, ida liuhusi bolsa estudu husi UPN rasik, daruak ita espera bele iha bolsa estudu husi Timor-Leste, no datoluk maka serbisu rasik,” nia akresenta.
Iha fatin hanesan, Sekretáriu Estadu Ensinu Sekundáriu Jerál no Ensinu Tékniku Vokasionál, Domingos Lopes Lemos, konsidera, presiza tan iha enkontru dala-ida tan ba realizasaun kooperasaun ne’e, nune’e hetan detallamente entre parte rua.
“Ohin mai ko’alia oituan kona-ba prosesu iha Universitas Pembangunan Nasional Veteran Jogjakarta, ne’ebé ohin ita ko’alia kona-ba kondisaun relevánsia iha ita-nia rain, ohin ita hasoru malu no ko’alia maibé ita sei ko’alia detalla kona-ba ita-nia estudante ne’ebé iha interrese hakarak kontinua iha UPN Veteran. Ita sei ko’alia ho Diresaun relevante iha Ministériu Ensinu Superiór Siénsia no Kultura hodi haree ba prosesu akordu ho UPN ne’ebé hakarak halo kooperasaun. Sira-nia ezijénsia mak karik timoroan iha inisiativa,” nia tenik.
Jornalista : Osória Marques
Editora : Julia Chatarina
