DILI, (ANTIL)- Hosi totál orsamentu millaun US$ 14,250 ne’ebe Governu aloka ba eleisaun 2017 (Prezidensiál ho Parlamentár), instituisaun Polísia Nasionál Timor-Leste (PNTL) hetan alokasaun osan millaun US$ 2,5.
Diretór Jerál Finansa Estadu, Ministériu Finansa (MF), Januario da Gama esplika, bazeia ba desizaun husi Primeiru-Ministru, Rui Maria de Araújo, hodi halo retifikasaun ba distribuisaun plafon (tetu) orsamentu ba eleisaun 2017 ho totál orsamentu ne’ebé aloka hamutuk millaun USD $ 14,250 hosi totál ida ne’e, retifikasaun Primeiru-Ministru nian, distribui millaun US$ 10 ba Ministériu Administrasaun Estatál (MAE), millaun USD $ 2,5 ba Polísia Nasionál Timor-Leste (PNTL), millaun USD $ 1,5 ba Falintíl-Forsa Defeza Timor-Leste (F-FDTL).
“Husi distribuisaun orsamentu sira ne’e, atubele fasilita ezekusaun imediata no lalais entaun, Ministério das Finanças estabelese padraun prosedimentu operasionál ida ba ministériu sira atubele ezekuta direita através Ministério das Finanças mak CPV, halo commit CPV osan hira mak iha ne’e, depois ami notifika CPV ba ministériu sira mak halo aprovizionamentu rasik no tama ba iha sistema to’o iha pagamentu finál mai iha Tezouru,” Januario Gama informa ba ANTIL, iha nia servisu fatin.
MF liuliu Dotação Todo Governo simu de’it relatóriu ezekusaun husi ministériu sira kona-ba gastu ne’ebé halo iha atividade eleisaun jerál nian.
Januario hatete, iha semana kotuk, MF entrega ona Cost Per View (CPV) lubuk ida ba MAE hodi halo ona serbisu aprovizionamentu hodi sosa urna sira, tinta no nesesidade ba eleisaun ninian.
“Iha loron hirak liubá CPV ami konklui no entrega tan ona CPV lubuk ida no sira halo serbisu aprovizionamentu lubuk ida. Prinsipalmente, kuandu ita halo ona serbisu aprovizionamentu signifika tenke hein, depende ba modalidade aprovizionamentu ne’ebé sira hili. Sé single source signifika imediatamente sira halo kontratu tanba hetan ona preferénsia ruma bele hetan sasán ne’e lalais. Sé uza RFQ (Request for Quotation-read) signifika loron 14 no depende ba modalidade ne’ebé hili,” nia dehan.
Januario esplika, kestaun mak dalaruma iha adiantamentu ka kustu operasionál iha munisípiu tanba MF aplika modalidade tranferénsia liuhusi konta bankária. Sekretáriadu Téknika Administrasaun Eleitorál (STAE) iha Munisípiu Covalima nia konta bankária haruka mai MF. Despeza saida de’it mak halo iha munisípiu, kada munisípiu halo tranferénsia diretamente husi konta MF no ba konta munisípiu nian.
“Ida ne’e ita realiza hotu ona husi parte Dotação Todo Governo ba Tezouru para realiza tranferénsia ba iha ne’ebá,” dehan Januario.
Nia hatutan, “Prosesu mak tenke halo verifikasaun ba adiantamentu ne’ebé uluk STAE foti maibé relatóriu seidauk hatama ba MF. Entaun, prosesu transferénsia iha impaktu uitoan tanba regra ne’ebé iha katak atu fó adiantamentu seluk, relatóriu adiantamentu anteriór tenke hatama uluk”.
Januario da Gama hatutan, STAE foti ona adiantamentu iha nivel nasionál ba iha formasaun, viajen lokál no konfirma mós orsamentu ba formasaun nian tanba Tezouru mós prosesa ona xeke nune’e sira bele foti.
Jornalista: Maria Auxiliadora/ Editor: Gantry Meilana
