DILI, (TATOLI) – Sekretariadu Estadu Polítika, Formasaun Profesionál no Empregu (SEPFOPE), ohin iha salaun Delta Nova realiza semináriu hodi komemora loron traballadór ne’ebé monu iha loron 1 fulan-maiu ho objetivu dignifika servisu nain nu’udar ajente ba dezenvolvimentu Nasaun.
“Governu liuhosi SEPFOPE hato’o parabéns ba trabalhadór timoroan sira iha rai laran, rai liur no área remotas, hakuak boot, imi sai ajente dezenvolvimentu, sujeitu dezenvolvimentu no autór ba dezenvolvimentu”, hato’o Sekretariadu Estadu, Ilídio Ximenes iha semináriu.
Dezenvolvimentu la’os tur de’it maibé presiza atualiza liuhosi asaun konkreta. Konkretiza asaun, ita fó liman ba malu, fó badaen atu dezenvolve Nasaun, katak nia.
Iha fatin hanesan Prezidente komisaun organizadora, Florêncio Martins Rego haktuir loron mundiál akontentese tanba iha 1987 iha Estadu Unidus Amérika, trabalhadór sira halo manifestasaun hasoru autoridade no kapitalista sira konaba oras serbisu. Nune’e, loron 19 to’o 20 ba loron ida, balun hetan kastigu no mate. Ikus mai liuhosi kongresu nasionál sosialista, deside loron 1 fulan-maiu hanesan loron mundiál ba trabalhadór sira.
Hodi dehan tan, Governu hahú kedan governasaun dahuluk sempre komemora loron ne’e. “Governu responsabiliza no organiza ho sosiedade sivíl sira no parseiru dezenvolvimentu hanesan CCI-TL, KSTL hodi haree asuntu importante, liu-liu iha konteksu industriál nian”.
Partisipantes husi seremónia ida ne’e mak diretor, xefia no staff SEPFOPE, setór privadu sira, parseiru SEPFOPE hanesan Konfederasaun Sindikatu Timor-Leste (KSTL), CCI-TL, no parseiru internasionál International Labour Organization (ILO).
Jornalista: Julia Chatarina
Editora: Rita Almeida
