DILI, (TATOLI) – Eis-xefe estadu, José Ramos Horta hatete atu reforsa tan kualidade edukasaun iha ensinu aprendijazen, governu presiza dezenvolve estratéjia ho igreja.
“Ita tenke dezenvolve ho igreja katólika hanesan parseria foun ida e parseria estratéjika iha área edukasaun”, hateten diplomata seniór timoroan ne’e iha salaun Lalini-Larigutu, CNE (Comissão Nacional das Eleições) ba kongresu datoluk edukasaun nian ne’ebé sei termina aban, kuarta, (17/5).
Bainhira sai oradór ba palestra ho tema: “Sonhar educação: Uma Visão Para Timor-Leste”, nia reforsa katak governu presiza halo tan parseria ida ne’ebé dinámiku liutan ho igreja. “Hodi hadi’a sistema ensinu,” akresenta eis-diplomata ne’e.
Kestaun ne’e, nia akresenta tan tuir nia observasaun katak alende eskola públika sira iha Timor-Leste no rai li’ur ne’ebé di’ak eskola ne’ebé jere husi igreja mós hetan prestasaun ida ne’ebé di’ak tebes.
“Eskola katólika hatudu rezultadu di’ak, iha rai li’ur inklui mós Indonézia”, haktuir.
Eis-prezidente ne’e mós hateten katak governu mós presiza tau atensaun ensinu tékniku profisionál sira nune’e bainhira termina estudu ema labele hanoin de’it atu sai funsionáriu públiku.
“Eskola formasaun profisionál ka vokasionál, área ida ne’ebé presiza tau atensaun liu”, hakotu.
Jornalista: Rafy Belo
Editora: Rita Almeida
