DILI (TATOLI)—Timor-Leste maske otas nurak nu’udar nasaun, maibé hatudu ona nia prestasaun oinsa atu harii pas iha nasaun frazil sira.
Ofisial Polítika Públika Gabinete Primeiru Ministru, Alex Tilman konsidera konfrensia G7+ ne’ebé realiza iha Timor-Leste nu’udar espasu ida atu partilla esprensia Timor-Leste harii pas, estabilidade no kultura demokratiko hodi inspira nasaun frazil sira.
“Nasaun frazil sira tenki la’o tuir ita nia dalan, tanba ita konsege halo esforsu hodi harii paz no komitmentu implementa dezenvolvimentu sustentavel agenda 2030,” Alex Tilman informa ba TATOLI, bainhira hasoru malu iha nia knaar fatin, Kuarta (17/05).
Iha konfrensia G7+ ne’e difini mós mekanismu koperasaun Timor ho nasaun sira frazil no nasaun sira sei moris iha konflitu, ho objektivu ida atu harii pas.
Konfrensia G7+ ne’e sei realiza iha loron 22-23, Maio no sei partisipa hosi bainaka sira hosi CPLP, ASEAN, Iraq, Reprejentante Sekretáriu Jerál ONU.
Orador prinsipal hosi nasionál mak aktual Ministru Planiamentu e Investimento estratejiku, Kay Rala Xanana Gusmão no Ministru Kordenador Asunto Ekonomia, Estanislau da Silva, sira nain rua sei koalia iha loron dahuluk (22/05).
Aleinde ida ne’e Prezidenti Aútoridade Zona Especiais de Ekonomia Sosial Markadu Timor-Leste (ZEESM), Mari Alkatiri mós sai nu’udar orador iha konfrensia ho materia Investimentu.
Primeiru Ministru Rui Maria de Araújo iha loron 23, Maio sei aprejenta kona-ba area saúde liu-liu oinsa implementasaun programa saúde familiar.
Konferensia G7+ durante loron rua ne’e sei organiza hosi Gabineti Primeiru Ministru, parseria ho G7+, Governu Suesia no Nova Zelandia, Banku Dezenvolvimentu Izlamiku, Nasoens Unidas no PNUD, Embaixada estadus Unidus Iha TL, Kamara Komersiu no Industria (CCI-TL).
Jornalista : Julia Chatarina
Editor : Manuel Pinto
