DILI, (TATOLI) – Adjuntu Sekretariadu Jerál (SekJer) Organizasaun Nasoens Unidas (ONU) no Diretór Rejionál UNDP (United Nations Development Programme) Azia Pazífiku, Haoliang Xu sei vizita Timor-Leste husi loron 19 to’o 25 maiu.
Tuir komunikadu ne’ebé Ajensia Tatoli asesu, Haoliang Xu reprejenta SekJer ONU durante Konferénsia Globál ajenda 2030 ne’ebé sei realiza iha 22 to’o 23 maiu.
Nia sei ko’alia iha sesaun abertura husi parte SekJer ONU nian no sei halo intervensaun hanesan oradór prinsipál roteiru ba implementasaun Objetivu Dezenvolvimentu Sustentável (ODS) ba nasaun frajil no konflitu.
Selebrasaun tinan 15 restaurasaun independénsia, no tomada posse ba Prezidente eleitu, Francisco Guterres Lú-Olo iha loron 19 no 20 maiu, sei reprezenta husi Xefe Gabinete, Maria Luiza Ribeiro Viotti , akompaña husi Diretór Rejionál UNDP.
Konferénsia ne’e organiza husi governu ho parseiru sira membru informal nivel a’as suporta grupu ODS no sekretariadu G7+, ho suporta husi ONU Timor-Leste.
Haoliang Xu sei iha oportunidade sai testamuña ba operasaun no programa iha nivel nasaun nian.
Oportunidade atu hasoru no enkontru pessoal ho nivel a’as husi governu Timor-Leste no parseiru dezenvolvimentu iha futuru inisiativa implementasaun ODS.
Nia mós sei hasoru benifisiáriu programa área rural no urbana iha Ermera.
Jornalista: Julia Chatarina
Editora: Rita Almeida
