DILI (TATOLI)— Prezidenti Repúblika, Dr. Francisco Guterres Lú-Olo prmote katak, perante nia mandatu sei fó atensaun espesiál no interese prosesu harii ka markasaun fronteira marítima no terrestre ho nasaun vizinu hanesan Austrália no Indonézia.
“Ho rai rua ne’e, ita sei haka’as án nafatin atu hetan solusaun justa no ekuitativa tuir prinsípiu no norma Direitu Internasionál haruka,” Prezidenti Repúblika, Dr. Francisco Guterres Lú-Olo hato’o kestaun ne’e liuhusi ninia deskursu hafoin simu tomada pose nu’udar Prezidenti Repúblika ba dahaat iha Tasi-Tolu, Dili, Sesta meia noite.
Aleinde ne’e, tuir Lú-Olo, Ita presiza rekunese kna’ar ne’ebé Frente Diplomátika hala’o uluk ona hodi loke dalan ba Restaurasaun Independénsia no ikus mai Frente ida ne’e sai mós matadalan ba diplomata timoroan sira.
Nune’e relasaun multilaterál Timor-Leste nian ho rai sira ne’ebé fó kontribuisaun maka’as tebes ba TL nia istória, rai sira ne’e maka sei sai nafatin hun metin ida ba TL atu afirma án iha rejionál no internasionál, nune’e bele sai nasaun ida ne’ebé ativu no relevante.
“Parseria ho ONU, ASEAN, CPLP no Uniaun Europeia ne’ebé ajuda harii instituisaun nasionál sira tenki buras nafatin no TL nia intervensaun iha fórum sira ne’e no sira seluk, rejionál ka internaionál, ho karáter ekonómiku ka polítiku, sei haforsa liu-tan,” nia tenik.
(Jornalista: Xisto Freitas)
(Editór : Manuel Pinto)
