DILI, (TATOLI) – Kuandu motor, helem, kareta no sasan ne’ebé lakon iha laran, wainhira estasiona iha fatin estasionamentu urbana, Governu sei la responsabiliza maibé só iha dever atu tau matan no kotrola nafatin hodi labele hamósu aktu sira ne’e.
“Dekretu lei númeru 3/2017, 22 Marsu, koalia kona-ba rejime zona estasionamentu ho durasaun limitada, iha artigu 13. 3 koalia kona-ba estadu iha responsabilidade atu prepara fatin ba utilizadór veíkulu, maibé la responsabiliza kuandu sasan ruma lakon iha fatin estasionamentu,” Diretóra Nasionál Mobilidade Urbana, Justina de Jesus Amaral ba Ajénsia Tatoli, ohin iha nia servisu fatin Vila-Verde.
Justina de Jesus esplika, planu ba área pilotu estasionamentu kobre iha munisípiu Dili pertense iha Jardim 5 Maiu nia sorin, Otel Timor nia sorin parte leste, rua 25 Abril halai hosi Banku Mandiri no BNU nia oin, entrepostu nia oin, eis dolok halai to’o iha Kolmera Western Uniaun.
Polítika estabelese zona estasionamentu ne’e finansia hosi ajénsia dezenvolvimentu nasionál (AND) ho kustu 25 mii atu halo ba fatin parazen veíkulu nian iha Estrada ninin. osan ne’e barak liu uza ba hanesan projetu pintura liña estasionamentu.
Nune’e mós, order sinalétika mak sei tau iha fatin estasionamentu ho eskrita pago (Selu), jeralmente iha veíkulu hotu ne’ebé para oras ida ho presu hanesan, nune’e mós la para to’o oras ida sei selu nafatin oras ida nian.
Kareta lijeiru hanesan pick up, kareta naton, tasi no mikrolet ho selu 25 Cent, kareta pezadu semi reboka no tronto ho pagu 75 Cent, pezadu merkadoria hanesan Bus, truck sei selu 50 Cent enkunatu motorizada sei selu 10 Cent.
Veíkulu hotu sei kona taxa eseptu kareta ambulansia, bombeirus, PNTL no F-FDTL ne’ebé servisu iha emerjensia nia.
Enkuantu defisiente mak sei hetan gratuita kuandu sira estasiona iha fatin estasionamentu ne’ebé mak sei lokaliza iha Kolmera no Banku oin.
Jestaun ba estasionamentu sei halo hosi Autoridade Munisipal Dili, maibé Diresaun Nasionál Mobiliade Urbana no diresaun sira seluk sei fo asisténsia tékniku atu ajuda sira atu ofisiál bele halo jestaun iha estasionamentu ho didi’ak.
Justina de Jesus Amaral husu ba Seguransa estasionamentu nian, tenki servisu ho onestu, maibe antes halo seguransa sei hetan uluk treinamentu hodi nune’e bele garante transparansia iha orsamentu liu-liu orsamentu ba billete ne’ebé seguransa sira hasai iha fatin estasionamentu.
“Kuandu sira servisu ladi’ak ita sei hasai sira, enkuantu ita sei prepara CCTV hodi bele prepara atu kontrola servisu ofisial estasionamentu,” Justina de Jesus reforsa.
entertantu politika pilotu estasionamentu ho objetivu atu organiza sidade, eduka komunidade atu bele para kareta no motor tuir fatin no aumenta reseita hosi fatin estasionamentu ba estadu.
(Jornalista : Zezito Silva)
(Editór : Manuel Pinto)
