DILI, (TATOLI) – Primeiru-Ministru, Rui Maria de Araújo hodi VI Governu Konstitusionál nia naran hato’o parabéns ba labarik sira iha Timor-Leste no hateten katak governu haree no tetu katak asuntu labarik nian, asuntu ida ne’ebé seriu no persiza atensaun espesiál.
“Konsellu Ministru aprova ona Planu Asaun Nasional ba Labarik périudu 2016-2020”, informa xefe governu ne’e liuhusi nia gabinete, ohin.
Aprovasaun ne’e hala’o liuhusi liu husi resolusaun Governu númeru 27/2017 hodi fó biban ba entidade sira ne’ebé hola desizaun, atu fóo prioridade no tau atensaun boot liu-tan ba asuntu labarik nian.
Governu hatudu ona nia kompromisu hodi aprova Planu Asaun Nasionál ba Labarik, maibé sei la-hotu ho de’it aprovasaun ida ne’e.
Governu sei nafatin haka’as-án atu lori mudansa positivu ba labarik sira nia moris, hodi nafatin enkoraja sidadaun atu iha kompromisu.
Nune’e mós asume responsabilidade individuál nu’udar inan no aman, nomós reforsa liu tan kompromisu sosiedade nian, lider politiku sira, no entidade hotu ne’ebé serbisu ba labarik nia di’ak, atu hamutuk implementa Planu Asaun Nasional ba Labarik ho konsistensia no persisténsia.
Planu Asaun Nasionál ba Labarik maka matadalan ida ba Governu no parseiru sira hotu, atu define polítika, reforsa kuadru legál ne’ebé iha ona, no define programa no atividade sira ne’ebé sei benefisia no lori mudansa ba labarik sira iha Timor-Leste.
Entretantu tema ba komemorasaun loron mundiál labarik nian iha Timor-Leste ba tinan ida ne’e mak “Investe Ba Labarik Nia Futuru; Reforsa Kompromisu Polítiku Ba Implementasaun Planu Asaun Nasionál Ba Labarik!”.
Katak, ita no entidade hotu atu investe ba labarik sira-nia moris iha familia no komunidade, ne’ebé nakonu ho domin no kuidadu.
Labarik sira iha direitu tomak ba identidade, saúde, nutrisaun no kualidade edukasaun; livre husi formas violénsia oin-oin, espresa sira nia hanoin, no hetan oportunidade atu hakiak mentalidade poupansa, ba labarik ida-idak sira nia futuru.
Investimentu hirak ne’e nu’udar dalan ida hodi prepara labarik sira sai kualifikadu tanba Timor-Leste nia futuru depende ba labarik sira.
Loron mundiál labarik nian monu iha 1 juñu kada tinan no Timor-Leste mós selebra loron importante ida ne’e.
Governu Timor-Leste, liu husi proposta ne’ebé mai husi Komisaun Nasional ba Labarik, formaliza, Planu Asaun Nasional ba Labarik ba tinan Lima nia laran, hahú husi 2016.
Jornalista: Rafy Belo
Editora: Rita Almeida
