DILI (TATOLI)—Boxista ho klase Layang Senior (49kg) ho naran Antoninho dos Santos hosi Asosiasaun Boxe Munisípiu Ermera, konsege hakat ba finál, tanba iha jogu segundu parte iha kinta (01/06) halakon ninia adversáriu Mário B. Kali hosi (Indo-Belu) iha ronde 3.
Antoninho boxista senior ne´ebé sempre defende másimu ninia klase, tanba iha Agustu 2017 sei reprezenta boxista Timor-Leste iha eventu internasionál Sea Games iha Thailándia.
Boxista ne’e aleinde domina nia tékniku boxing, nia mós iha skill joga oinsá bele halakon nia kontra iha rin leten. Tanba ne’e, maske iha jogu segundu parte boxista Indonézia, Mário B. Kali hatudu jogu ne´ebé másimu, maibé Antoninho sempre buka maneira oinsá para bele tuku kona Mário barak liu iha partai (6) ne’e, ikus mai bele manán iha jogu refere hodi hakat ba jogu finál sesta ne´e (02/06) hodi kontra boxista José B. Quintas.
Antoninho dos Santos hateten tenke halo preparasaun ne´ebé maka di´ak hodi kompete iha primeiru lugár, tanba ne’e tenke esforsu hodi bele manán iha finál ida ne’e.
“Ha´u tenke esforsu án para hodi hatun ha´u nia adversáriu tanba liuhusi eventu ida ne’e mós hanesan halo preparsaun ba Sea games iha Agustu tinan ne’e,” nia dehan ba jornalista iha Jináziu Munisipál Maliana, kinta horsehik, ne´ebé Ajénsia TATOLI asesu hosi fonte ofisiál FBATL.
Nia esplika tékniku ne´ebé maka uza hodi hatún adversáriu maka liuhusi forsa tanba ne’e presiza matan lais no nia mós kuñese ona frakeza hosi ninia adversáriu tanba hasoru malu bebeik iha ring leten iha kompetisaun.
Boxista hosi Asosiasaun Boxe Ermera ne’e fiar nia án katak sei manán nia adversáriu iha finál ho rezultadu KO (knoct out). (Jornalista: Xisto Freitas)
