DILI, (TATOLI) – Universidade Nasionál Timor Lorosa’e (UNTL) ho JICA (Japan International Cooperation Agency) komprometidu atu kontinua serbisu hamutuk iha área ne’ebé estabelesida ona.
Reitór UNTL, Fransisco Miguel Martins, horseik, kinta (1/6) simu vízita husi xefe foun Reprezentativu JICA ba Timor-Leste, Masafumi Nagaishi iha salaun video konferénsia UNTL, Avenida Lisboa, Díli, Timor-Leste.
Iha sorumutu ho reprezentante JICA ne’e, reitór universidade públika ne’e manifesta nia orgullu no apresiasaun ba ajénsia kooperasaun Japaun nian ne’e tan kontinua koopera ho UNTL.
Nune’e mós reprezentante Masafumi Nagaishi konfirma katak JICA hakarak kontinua serbisu hamutuk ho UNTL iha área ne’ebé estabelese tiha ona.
Entretantu, hahú 2001 to’o 2003, governu Japaun liuhusi JICA hala’o ona kooperasaun ho Fakuldade Enjeñária, Siénsia no Teknologia (FEAST), UNTL. Projetu dahuluk ajuda ona husi Fundu Asisténsia Rehabilitasaun Urjente.
Husi 2003 to’o 2005, Japaun haruka espertu lubuk ida hadi’a kapasidade hanorin husi dosente sira iha UNTL.
Husi 2006 to’o 2010, Japaun implementa ona projetu kooperasaun tékniku ne’ebé bolu CADETES, “Dezenvolvimentu Kapasidade ba Estaf Hanorin iha Fakuldade Enjeñária, Siénsia no Teknologia UNTL nian”, ne’ebé dudu ona sira atu bele hadi’a kapasidade hanorin, peskiza no jestaun ba fakuldade.
Hahú fevereiru 2011, Japaun implementa ona “Projetu ba Dezenvolvimentu Kapasidade ba Fakuldade Enjeñária, Siénsia no Teknologia Universidade Nasional Timor-Lorosa’e”.
Estudante hamutuk 17 husi Departementu Enjeñária Mekánika, Enjeñária Konstrusaun Sívil, Enjeñária Elektro no Elektrónika, Siénsia no Teknologia UNTL hodi estuda ona iha Japaun no hetan ona lisensiatura akadémika.
Estudante hirak ne’e hala’o sira-nia estudu iha Universidade Saitama, Universidade Yamaguchi, Universidade Gifu, Universidade Teknologia Nagaoka no Universidade Komunikasaun-Elektro iha nasaun ne’e.
Bele klik mós iha ne’e: www.timor-leste.emb-japan.go.jp/PR%200620%20tetun.pdf
Jornalista: Rafy Belo
Editora: Rita Almeida
