DILI (TATOLI)—Boxista klase Bantam Senior (56kg) ho naran Octavianus Bou hosi Asosiasaun Boxe Belu (Indonézia) sai hanesan boxista mellór iha Turnament Regional Open Maliana, 30 Maiu-02 Juñu 2017.
Iha jogu primeiru (31/05), boxista Octavianus konsege manán ho rezultadu númeru ás ba nia adversáriu Filomeno Q. hosi Asosiasaun Boxe Manatuto iha ronde 3. Jogu segundu loron (01/06), Octavianus kontinua manán boxista hosi Asosiasaun Boxe Viqueque, Abílio Orlando ho rezultadu númeru ás (ronde 3). Iha jogu finál (02/06), boxista Indonézia ne’e kontinua defende nia pozisaun, hodi mantein nafatin manán boxista Romário S. Teti hosi Asosiasaun Bobonaro ho rezultadu KO (knoct out) iha ronde (2).
Boxista Octavianus Bou senti haksolok tanba nia konsege defende nia klase hodi sai primeiru lugár, no ikus mai juri desidi nia maka sai hanesan mellór boxista iha Turnament Regional Open.
Segundu lugár iha klase Bantam Senior maka Romario S. Teti, terseiru lugár hamutuk (bersama) entre Abílio Orlando ho Teonizio S. Enkuantu, prémiu ne´ebé hetan hosi klase Senior maka hanesan primeiru lugár $500.00, segundu lugár $300.00 no terseiru lugár $200.00, inklui ho sertifikadu hotu.
Ba klase Bantam Junior primeiru lugár maka Alosius D.M, segundu lugár Frederico D.N. no terseiru Etelino da Costa ho Aquintino F. Prémiu ba primeiru lugár ho osan $200.00, segundu lugár $150.00 no terseiru $100.00 inklui sertifikadu. (Jornalista: Xisto Freitas)
