DILI (TATOLI)–Prezidénsia Konsellu Ministru (PKM) lansa no koordena formasaun intensiva kona-ba área Planeamentu Estratéjiku E-Gov no Jestaun projetu iha teknolojia informasaun no komunikasaun (TIK), iha Diresaun Nasionál Registu no e Notariadu, Colmera, Dili, ohin.
Pontu Fokál Timor-Leste Servisu Públiku PALOP no Timor-Leste (PASP/PALOP-TL), Elisabeth Batista informa, objetivu husi formasaun rua ne’e atu kapasita funsionáriu sira ne’ebé iha nível jestaun liliu iha informátika ninian.
“Nune’e sira bele halo planeamentu no estratéjiku ne’ebé mak iha no di’ak ba iha implementasaun sistema informátiku ninian,” pontu fokál, Elisabeth Batista esplika.
Formasaun ne’e partisipa husi reprezentante liña ministeriál sira inklui reprezentante husi gabinete prezidente repúblika.
Formasaun ne’e hala’o durante semana rua, hahú ohin no sei termina iha sesta (23/06) ho formadór sira mai husi Universidade do Minho Portugal no Universidade Nasun Unida, Luís Amaral, João Varajão no Luís Fereira.
Entretantu, lansamentu formasaun kona-ba Planeamentu Estratéjiku E-Gov no Jestaun ba projetu iha teknolojia informasaun no komunikasaun (TIK) ne’e asiste direta husi reprezentante Uniaun Europeia ba Timor-Leste, Simon Le Grand inklui konvidadu sira.
(Jornalista: Rafy Belo)
