DILI (TATOLI)—Reitór Universidade Nasionál Timor-Lorosa´e (UNTL), Francisco Miguel Martins hatete, UNTL sente orgullu teb-tebes tanba alumi UNTL ida mak ohin loron okupa kargu Prezidente Repúblika Timor-Leste, alumi ne’e mak Dr. Francisco Guterres Lú Olo.
“UNTL senti orgullu teb-tebes no onradu tanba ninia alumni ida sai prezidenti repúblika,” Reitór Universidade Nasionál Timor-Lorosa´e (UNTL), Francisco Miguel Martins hato´o kestaun ne´e ba jornalista sira iha Palásiu Prezidénsia Repúblika, Bairu-Pité, Dili, kuarta ne´e, hafoin ramata inkontru ho Prezidenti Repúblika, Dr. Francisco Guterres Lú-Olo.
UNTL onradu ba Lú Olo nu’udar Prezidenti tanba ho Lú Olo nai pozisaun UNTL hetan mós apresiasaun boot hosi povu no komunidade internasionál iha rai laran no rai liur.
Alumi UNTL ne’ebé mak oras ne’e okupa kargu públiku aleinde Lú Olo, ida mak atuál Prezidenti Parlamentu Nasionál, Dr. Aderito Hugo da Costa no Komandante Jerál Polísia Nasionál Timor-Leste (PNTL), Komisáriu Júlio da Costa Hornay.
Ho susesu alumi hirak ne’e nia reitór UNTL afirma, UNTL kontinua hala´o nia kna´ar nu´udar formadora, produtora sientífika, desiminasaun kuñesementu no sei hakiak ema di´ak ba futuru nasaun ida ne´e.
“UNTL serbisu ba futuru nasaun. Tinan hirak ba kotuk ita hakiak kondisaun sira ne´e, ohin loron fó ona rezultadu ba ita nia povu no nasaun. Ne´e katak, institusionalmente, UNTL oferese ona buat di´ak ruma ba ita nia povu no nasaun nomós kompromte atu fó formasaun di´ak liu-tan ho loloos ba rai Timor,” reitór Francisco esklarese.
Hodi esplika, estrutura UNTL sorumutu ho Prezidenti Lú-Olo, ohin, Kuarta (04/07) ho objektivu atu kongratula Prezidenti foun no hato´o informasaun jerál kona-ba andamentu universidade ninian hanesan atividade akadémika, atividade extra kurikulár no kurikulár universidade no posibilidade aktu dezenvolvimentu universidade digna iha futuru. Pur-ezemplu, dezenvolvimentu fakuldade no kooperasaun internasionál sira.
Nu’udar obrigasaun moral UNTL nian, hodi fó hatene ba alumi UNTL Lú Olo nu’udar xefi estadu.
“Prezidenti Repúblika nu´udar aman ba nasaun, nia tenki hatene lala´ok u universidade nian,” Magnífiku Reitór ne´e haklaken.
(Jornalista: Xisto Freitas, Editór : Manuel Pinto)
