ATAÚRU (TATOLI)—Rádiu Komunitáriu Manu koko, 99.00 FM Ataúru nia kobertura konsentra liu-ba, oinsá konservasaun ba ambiente no rikeza naturál sira iha Ataúru tanba Ataúru ne’e illa no presiza konserva duni.
“Konserva ambiente, natureza mak ami foka beibeik iha ami-nia rádiu,” informa jestór Rádiu Manukoko, Miguel de Jesus iha entrevista eskluziva ho Ajénsia Tatoli, hafoin inaugurasaun rádiu ne’e, iha suku Manu koko, Postu Administrativu Ataúru, Díli, iha fim-de-semana ne’e.
Jeralmente informasaun kona-ba edukasaun, saúde no dezenvolvimentu inklui asuntu importante seluk ne’ebé mak eziste no la’o iha Ataúru. Seluk mak diverte komunidade sira liuhusi dedikasaun múzika.
Rádiu Komunitáriu Manu koko, 99.00 FM tranzmite informasaun sira ne’e no fó divertimento tanba komunidade sira mós presiza.
“Ho buat simples ne’ebé ita iha bele kontribui ba komunidade,” akresenta jestór Miguel de Jesus.
Oráriu ne’ebé mak rádiu komunitáriu ne’e iha hodi halo tranzmisaun mak hahú tuku 18:00 to’o 23:30 kalan. “Programa ne’ebé mak iha haree mós ba tempu, oras eletrisidade. Tempu limitadu, iha kalan mak halo tranzmisaun,” dehan jestór ne’e.
Rádiu komunitáriu ne’e mós la iha instalasaun rede internet telekomunikasaun nian hanesan Timor Telecom (TT), Telemor namoos Telcomsel. “Mehi atu hetan asesu maibé sira ne’e hotu depende ba rekursu,” nia reál sá.
Jestór ne’e esplika katak informasaun sira ne’ebé mak prodúz husi voluntáriu rádiu ne’e, ho jestaun simples ne’ebé funsiona la signifika eduka ema hothotu kona-ba sentidu no prinsípiu rádiu komunidade ne’e rasik.
Maibé, komunidade presiza informasaun no formasaun opiniaun liuhusi informasaun kona-ba saida mak rádiu komunidade. “Ita presiza informa beibeik ba komunidade hodi sente katak rádiu ne’e ita-nian,” voluntáriu ne’e konklui.
Entretantu, antes ne’e CI (Conservation International) fó sai katak illa Ataúru nu’udar illa ne’ebé riku ho bio diversidade Marítima iha mundu.
(Jornalista: Rafy Belo)
(Editór : Manuel Pinto)
