DILI (TATOLI)—Portavóz Movimentu Reformasaun Agrária hosi Munisípiu Liquiça, Madalena Bidau Soares “Kasian” hateten atinji dezenvolvimentu ne´ebé di´ak, timoroan sira presiza serbisu maka´as no bainhira serbisu fraku ka hanoin maka problema de´it, sei husik nasaun monu.
Kestaun ne´e hato´o hosi Kasian ba jornalista sira iha Palásiu Prezidente Nicolau Lobato, Bairru Pité, Dili, Tersa ne´e, hafoin konvida Prezidente Repúblika, Francisco Guterres Lú Olo atu loke primeiru kongresu Movimentu Reformasaun Agrária iha Minisípiu Liquiça, 23 Novembru tinan ne´e.
Nia dehan sira lakohi ko´alia polítika prátiku demais maibé hakarak polítika ida ne´ebé ho objetivu haburas nasaun maka ás liu. “Ita timoroan hatene halo funu hodi liberta pátria no hatene mós dezenvolve ninia nasaun. Ita lakohi tinan-tinan tane liman de´it ba Governu,” veterana ne´e informa.
Iha oportunidade ne´e, Kasian afirma, objetivu hosi kongresu Movimentu Reformasaun Agrária ne´e atu eleje estrutura Movimentu refere no misaun hosi Movimentu ne´e atu rezolve rai sira ida ne´ebé maka ema seluk okupa hodi entrega hikas ba na´in no eduka rai na´in tenke halo uma iha rai refere no kuda ai-horis sira hodi bele serbí moris uma laran no nasaun.
“Tanba ne´e maka ami marka prezensa hodi konvida Prezidente Repúblika. Ami presiza teb-tebes Prezidente Repúblika nia prezensa iha 23 Novembru, nune´e komunidade toos-na´in sira bele rona liafuan enkorazamentu hosi Prezidente Repúblika para halo dezenvolvimentu di´ak ba rai ida ne´e,” portavóz esklarese.
Nia hatutan, temporariamente, membru hosi Movimentu Reformasaun Agrária iha de´it postu administrativu tolu hanesan Postu Administrativu Liquiça Vila, Maubara no Bazartete. Madalena haktuir katak Prezidente Repúblika disponível atu loke kongresu ne´e.
(Jornalista: Xisto Freitas)
(Editór : Manuel Pinto)
