LIKISÁ (TATOLI) –Prezidente Partidu Demokrátiku (P-PD), Mariano Assanami Sabino, promete bainhira Partidu Demokrátiku (PD) manan iha Likisá sei hadi’ak uluk estrada Rurais iha munisípiu Likisá laran.
“Estrada rurais sei sai prioridade dahuluk governasaun Partidu Demokrátiku nian ba Likisá,” atuál Ministru Minerais, hato’o promesa iha kampaña aberta PD ba dala 19 iha kampu futeból Munisípiu Likisá foin lais ne’e.
Tuir PD nia haree, area Bazartete nian estrada at los, maibé iha rai refere mak hahoris oan mane ida, nu’udar lider istóriku ba Timor-Leste, Nikolau Lobato.
“Lider istóriku Nikolau Lobato hanesan eroi ida husi postu administrativu Bazartete, maibé oras ne’e daudauk estrada iha ne’ebá sei at nafatin,” Assanami lamenta.
PD mós hakarak hadi’ak estrada rural iha Likisá, tanba tuir PD nia haree, dezenvolvimentu infraestrutura hanesan estrada rurais ajuda aselera prosesu modernizasaun ba sosiedade hodi bele alkansa sosiedade timoroan ne’ebé mak demokrátiku, síviku, no modernu.
Dezenvolvimentu infraestrutura bainhira di’ak ona, sei fasilita mós komunikasaun no transporte ne’ebé mak di’ak, uma di’ak ba povu sira, infraestrutura ba edukasaun, uma ba professor sira, uma ba parteira no doutór sira iha área rural ho klínika sira ne’ebé mak adekuadu.
Parte seluk Sekretáriu Jerál PD, António Conceição reforsa, PD hakarak halo revolusaun ba asuntu infraestrutura.
“PD hakarak duni halo revolusaun ba asuntu infraestrutura, tanba ne’e bainhira hetan fiar sei tau osan ba kada postu administrativu hodi bele tau konsentrasaun ba estrada rurais no bee-moos, nune’e populasaun sira bele hadi’a sira nia moris,” Atual Ministru Komérsiu Industria, informa.
Infraestrutura, PD sei tau prioridade iha tinan lima nia laran hodi tau osan tokon $2,5 ba kada postu administrativu, kada tinan.
Osan tokon $2,5 kuandu multiplika ba postu administrativu 65 iha territóriu hamutuk tokon $162 kada tinan atu dezenvolve infraestrutura kada postu, ne’ebé mak bele halo bee moos, estrada no seluk tan.
Alende ne’e, PD mós sei tau osan porsentu 15 ba iha setór saúde nian, asuntu veteranus, dezenvolvimentu ekonomia , turizmu no seluk tan.
Jornalista: Julia Chatarina
Editór : Manuel Pinto
