LIKISÁ (TATOLI)—Prezidente Partidu Demokrátiku (P-PD), Mariano Assanami Sabino afirma, Partidu Demokrátiku (PD) lakohi hetan votu iha Eleisaun Antisipada, tanba halo kampaíña ataka no hatún ema seluk, maibé PD hakarak ema vota ho konxiénsia.
“Ita hakarak hetan votus ho konxiénsia no síviku duni husi povu nian. PD presiza votu ho kualidade,” Mariano Assanami reálsá iha iha kampaña aberta, iha kampu futeból Munisípiu Likisá foin lais ne’e.
Prezidente Partidu Demokrátiku apela ba militante no simpatizante partidu Demokrátiku atu iha eleisaun mai vota ho konxiénsia, PD lakohi militante ida vota tanba ataka, trata no hatún ema. Bainhira vota tanba ataka, tarata, no hatún ema, konsidera hanesan votus ne’ebé mak laiha kualidade.
“Labele lakon tempu iha social media hanesan facebook atu ataka ema seluk uza identidade falsu,” Assanami fó hanoin. Hodi dehan Uza facebook ba kampaña, ba hato’o informasaun, kompromisu, no material kampaña ba inan aman sira.
Iha oportunidade ne’e, Assanami akresenta PD hanesan jerasaun kontínuadoor husi lider istóriku sira, ibun toos atu ataka, trata, hatudu liman no fó sala ba fundadór nasaun sira.
“Ita jerasaun sira nian, ita aprende husi sira no la’o ho sira, ne’e duni ita hamriik ho firme atu nafatin kontinua estadu ne’ebé sira hahoris, kaer metin atu la’o ba oin, ne’e mak ita nia lealdade no konsisténsia.”
Assanami apela mós atu kaer prinsípiu rekonsiliasaun, tanba la’ós estadu nia sala bainhira timoroan sira iha deferénsia ideia polítiku. tenke dignifika timoroan hotu, tanba ukun rasik an reprezenta timoroan hotu nia dignidade.
Jornalista: Julia Chatarina
Editór : Manuel Pinto
