iklan

NASIONÁL, EKONOMIA, DILI, MUNISÍPIU

Presu Foos Sa’e Tanba Kestaun Distánsia no Infraestrutura

Presu Foos Sa’e Tanba Kestaun Distánsia no Infraestrutura

Foos. Foto/Google.

DILI, (TATOLI) – Diretór Nasionál Regulasaun Komersiál Ministériu Komérsiu no Indústria (MKI), Domingos da Costa Soares, hatete folin nesesidade bázika hanesan foos iha munisípiu balun sa’e tanba kestaun distánsia no infraestrutura hanesan estrada.

“Foos kilo 30 ne’e mak nia folin sa’e, liuliu iha munisípiu sira balun konsege aumenta to’o $2.00 ka 1.50 ne’e depende ba distánsia ne’ebé mak munisípiu ida-ida iha”, Domingos dehan iha Bebora, ohin.

Domingos hatutan Kestaun lubuk ida mak kontribui ba presu ne’e tanba distribuidór sira sosa foos iha Dili no kuaze estrada iha territóriu hadi’a hotu nune’e difikulta iha mobilizasaun ba foos.

“Entaun sirkulasaun iha problema no foos ne’e sa’e ita haree husi parte esterna balun ne’ebé mak tuir informasaun ami rekolla husi distribuidór sira kuaze agora daudaun iha nasaun balun, hotu-hotu bá sosa foos iha Vietname”, katak tan.

“Kestaun ne’e tanba sira mós prepara hela ba sira-nia eleisaun entaun foos iha Vietname nia folin sa’e, kuandu ema sosa barak sira hasa’e nia presu entaun ida ne’e mak sai impaktu”.

Domingos Soares afirma maski iha munisípiu presu aumenta dólar ida ka rua mas bele dehan presu sei la’o ida dentru normál.

“Tanba seidauk sa’e to’o porsentu 10 signifika sei iha hela ita-nia forsa kompra sei maka’as hela no kestaun seluk dalaruma emprezáriu balun ne’ebé laiha reponsabilidade haree ba ita-nia polítika ne’ebé agora la’o talvés ida ne’e sai oportunidade ida ba sira, mas ida ne’e buat ki’ik husi ami-nia observasaun”.

Maibé MKI iha estoke ne’ebé sufisiente atu normaliza merkadu iha kualkér momentu kuandu situasaun presu liu ona porsentu 10 maka urjentemente sei halo intervensaun merkadu liuhusi Sentru Lojístika Nasionál ba problema ne’e.

“Mas liuhusi serbisu regulasaun komersiál iha munisípiu sira fó hela informasaun katak sei iha hela situasaun ida ne’ebé seidauk grave liu entaun ita sei fó oportunidade ba setór privadu sira atu normaliza merkadu ne’e rasik”.

Normalmente presu foos ho kilógrama 30 iha $15.50 to’o 16 mas depois ne’e aumenta dólar ida ka rua ho kestaun distánsia lori foos ne’e bá munisípiu sira mas ministériu preparadu hela kuandu sa’e maka’as halo inetrvensaun.

“Agora daudaun munisípiu ne’ebé presu sa’e maka’as mak Lautein, Bobonaru liuliu iha Lolotoe no Postu Administrativu Ataúru mós tanba kestaun ró, iha parte rai-klaran nia liuliu Turiskai mós sa’e to’o Hatubuiliku”.

Jornalista: Maria Auxiliadora

Editora: Rita Almeida

iklan
iklan

Leave a Reply

iklan
error: Content is protected !!