DILI (TATOLI)—Xefe Estadu Maior Jenerál FALINTIL-Forsa Dezesa Timor Leste (F-FDTL), Lere Anan Timur, apela ba Tribunál tenke kriminaliza ema sira ne’ebé insulta líder nasionál sira liuhusi karikatura.
Hanesan ezemplu, nia esplika, iha loron ida liu-ba, ema edita Primeiru-Ministru, Taur Matan Ruak nia foto depois tau tali ba iha kakorok nomós insulta tan ho liafuan mal edukadu.
“Timoroan balun la respeita no la dignifika líder nasionál sira nia esforsu no sira nia matenek ne’ebé halo Timor-Leste sai ukun-án. Hanesan ezemplu, sira tau tali ba primeiru-ministru nia kakorok hodi tara (publika iha medsos) hanesan mós uluk halo ba Prezidente Lú Olo, Xanana, Ramos Horta no Alkatiri. Ida ne’e ha’u dehan katak laiha edukasaun no morál,” Lere ba jornalista sira iha Palásiu Prezidente Nicolau Lobato, Bairru Pité, kuarta ne’e, hafoin levanta kestaun ne’e ba Prezidente Repúblika, Francisco Guterres Lú Olo.
Tuir nia katak ema ne’ebé halo ida ne’e (edita foto ho defama), dalaruma ema ne’ebé maka uluk lakohi ukun-án, ne’e duni, husu Tribunál tenke kriminaliza tanba ne’e krimi públiku no nia sei atua hahalok ne’e fora hosi lei.
“Ha’u nu’udar elementu seguransa ida nian, ha’u aban bainrua toman ema sira hanesan ne’e, ha’u atua fora hosi lei no ha’u hein para ema kontra ha’u nia desizaun,” eis Komandante Rezisténsia ne’e realsa.
Nia hateten, nia admira tanba buat sira ne’e kona de’it ba sira Rezisténsia Libertasaun Nasionál hanesan Marí, Xanana, Taur no Lú Olo, maibé la halo ba ema seluk.
Jornalista: Xisto Freitas
Editór : Manuel Pinto
