iklan

NASIONÁL, DESPORTU, DILI, HEADLINE

São José FC “liki” Lica-Lica Lemorai FC 2-1

São José FC “liki” Lica-Lica Lemorai FC 2-1

Jogu Liga Futebol Timor-Leste (LFTL) 2024, Lika Lika Lemorai konta São José FC, iha estadiun Munisípal Dili, sesta (17/05). Imajen Tatoli/Francisco Sony


DILI, 17 maiu 2024 (TATOLI) – Ekipa São José FC susesu iha nia jornada hodi “liki” adversariu Lica-Lica Lemorai FC ho rezultadu 2-1, iha jogu kontinuasaun kopa Federasaun Futeból Timor-Leste (FFTL) ne’ebé realiza iha Estádiu Munisipál Dili, sesta lokoraik.

Hanesan baibain iha kultura futeból jogu la’o jogadór sira lansa kedan kontra no atake ba malu liu husi duir bola husi ain ba ain, utiliza mós tékniku tuir abilidade idaidak nian.

Iha jogu ne’e São José halo kedan presaun maka’as hasoru Lica-Lica, maibé Lica-Lica mós la hatudu nia frakeza lansa mós kontra no atake hodi halo falla São José nia jogu.

Jogu Liga Futebol Timor-Leste (LFTL) 2024, Lika Lika Lemorai konta São José FC, iha estadiun Munisípal Dili, sesta (17/05). Imajen Tatoli/Francisco Sony

Lica-Lica hetan oportuniade barak atu ezekuta golu maibé la konsege tanba defeza São José tenta hamate tutuir no sutu barak mós salva husi guarda rede.

Jogu la’o ho barullu, minutu kontinua la’o ho hakmatek, maibé iha minutu 42 sorte di’ak monu ba São José liuhusi jogadór Expedito Conseição (11)  lansa ona golu primeiru hodi muda rezultadu ba 1-0.

Golu ne’e halo Lica-Luca tenke servisu maka’as liutan nune’e bele responde golu. Adeptus husi klube rua tur metin iha tribun leten hodi hakilar fó suporta ba ekipa favoritu ne’ebé sira apoiu. Maibé São José nian hakilar lian maka’as liu kompara ho Lica-Lica ne’ebé seidauk prodús golu.

Jogu la’o ona to’o minutu 45 árbitru deside adisonál tan minutu 2 maibé la rezulta tan golu ruma to’o minutu termina jogu tenke pauza minutu 15 hafoin tama fali ba minutu segunda parte vitoria provijoriu lidera husi São José.

Hakur ba segunda parte ekipa rua tenke servisu maka’as, São José esforsu atu aumenta golu, Lica-Luca esforsu atu halo empata jogu, ho nune’e kontra no atake sai manas liutan.

Lica-Lica haree ba jogu la’o ladun másimu iha minutu 46 deside dada sai jogadór na’in rua David Correia (16), Henrique da Costa (5) hodi substitui fali jogadór Agenuco Freitas (11), Jericson Ximenes (2) hodi halo moris dali jogu ne’ebé hahú maten dadaun iha lina klaran.

Iha minutu hanesan treinadór São José mós deside dada sai jogadór Gabriel da Costa (23) hodi hatama fali jogadór Janiel Fernandes (13). Bainhira halo mudansa ba jogu São José iha duni sorte liu husi jogadór Orcelio Novelito (3) prodús tan golu ida iha minutu 47 hodu muda rezultadu ba 2-0

Golu ne’e halo São José kontente liutan, Lica-Lica tur tane hasan hodi asiste, maibé treinadór Lica-Lica kontinua orienta jogadór sira halo jogu ho bonitu.

Jogu la’o to’o minutu 53 treinadór Lica-Lica deside hasai jogadór Deogo Soares (10) hodi hatama fali jogadór Januario Fonseca (8) nune’e bele halo jogu di’ak liutan, maske troka ona jogadór maibé São José nafatin domina jogu, nune’e iha minutu 62 treinadór dada sai tan jogadór Kefin Fernandes (14) hodi hatama fali jogadór Armindo Amaral (20).

Ekipa rua ataka malu ho velosidade ne’ebé maka’as nune’e iha minutu 79 bola barullu iha lina oin São José nian defeza São José halo erru hasoru avansadu Lica-Lica ikus árbitru tenke fó penalidade nune’e Lica-Lica halo sutu livre, sutu livre ne’e ezekuta husi jogadór Jenio dos Santos (19) ikus rezulta golu muda rezultadu ba 1-2.

Golu ne’e hasa’e tan ritmu jogu Lica-Lica nian halo presaun hodi halo empata jogu ne’e maibé la konsege tanba defeza São José la fó fatin, ikus minutu 90 árbitru deside adisionál tan minutu 5 maibé la rezulta golu to’o minutu termina rezultadu mantein ho 2-0. Nune’e vitoria hela ba São José hodi save pontu tolu, Lica-Lica hela ho derrota hodi hein jogu seluk tuir mai.

Jogu ne’e dirije husi árbitru Bernardino Mascarinhas, juiz liña Filomeno da Silva, Junifelson dos Santos no árbitru rezerva Fernando Costa.

Notísia relevante:Kopa Xanana, Warikoan FC “lulun” Irmão Timor 2-0

Jornalista: Hortencio Sanchez

Editór: Florencio Miranda Ximenes

iklan
iklan

Leave a Reply

iklan
error: Content is protected !!