DÍLI, (TATOLI)-Universidade Nasionál Timor Lorosa’e (UNTL) sai primeiru lugar ba diskursu ho lian japaun, nível báziku, ne’ebé promove husi embaixada Japaun iha Timor-Leste.
Diskursu lian Japaun ne’e nu’udar konkursu dahuluk ne’ebé mak hala’o iha Timor-Leste, husi Japaun.
“Ha’u sente orgullu tebes tanba sai hanesan primeiru lugar ba iha eventu ida ne’e. Iha diskursu ida ne’e mós fó mai ha’u oportunidade atu ha’u bele hakle’an, habelar liután ha’u-nia koñesimentu kona-ba língua Japaun nian,” hateten Vensedór primeiru lugar, Olívia Martins de Lima, ba Ajénsia TATOLI, iha Auditóriu-UNTL, ohin.
Estudante Fakuldade Ekonomia no Jestaun, Departamentu Turizmu, UNTL, ne’e mós esplika ba TATOLI katak nia objetivu aprende lian Japaun ne’e tanba hakarak dezenvolve lian japonés nian mós iha Timor-Leste.
Nune’e mós tanba liga ho nia prosesu aprendizajen, foti mós departamentu turizmu, hanesan ema turizmu, entaun tenke aprende no hatene lian barak.
Vensedora ne’e mós akresenta katak nia iha esperansa boot tebes, hodi dezenvolve di’ak liután nia koñesimentu linguístiku, ligadu ho lian japonés ne’e.
“Ba oin ha’u sei dezenvolve di’ak liután ida ne’e iha Timor-Leste i koopera di’ak liután ho Japaun” espera estudante semester haat, UNTL, ne’ebé sai primeiru lugar diskursu ho lian japaun ho tópiku ne’ebé nia hili; jestaun lixu iha Timor-Leste ne’e.
Enkuantu, segundu lugar ba kompetisaun diskursu lian japonés mak Silvino dos Santos, estudante UNTL mós, Fakuldade Enjeñária, Siénsia no Teknolojia (FEST), Departamentu Enjeñária sívil semester haat.
Diskursu lian Japaun nível intermédiu nian, primeiru lugar mak Julião Nunes, segundu lugar mak Inuzário da Costa Nunes no terseiru lugar monu ba kompetitór, Maria Yosefanke.
Iha fatin hanesan, Reprezentante Japan Foundation-Jakarta, Mari Hiruta, hafoin atribuisaun prémiu ba vensedór sira, enkoraja kompetitór sira ne’e atu nafatin iha korajen hodi aprende no meius sira hanesan ne’e timoroan sira bele koñese liután, nasaun no kultura povu japaun nian.
Atribuisaun prémiu hala’o direta husi embaixadór ba Japaun ba Timor-Leste, Hiroshi Minami, inklui Pró-reitór Asuntu Estudantil, Zeferino Viegas Tilman.
Kompetitór sira ne’e, alende estudante UNTL, inklui mós estudante husi Dormitóriu Sta. Rafaela, Bebonuk-Díli nomós interesadu seluk tan.
Kompetitór sira ne’e klasifika ba nível tolu; báziku no intermédiu. Sira mak hanesan, nível báziku kompostu husi Olímpia Martins de Lima, Silvino dos Santos no Otavia Marciana de Sousa do Rego.
Nível intermédiu kompostu husi Emília dos Santos, Suzia Auxiliadora (auzente ka falta), Inuzário da Costa Nunes, Julião Nunes José no Maria Yosefina.
Enkuantu nível avansadu (nu’udar diskursu espesiál de’it), reprezenta husi Tónico Morreira (husi instituisaun Falintil-Forsa Defeza Timor-Leste ka F-FDTL), Jonats Leong no Pedro Berelequi, nu’udar traballadór timoroan iha embaixada Japaun, iha Timor-Leste.
Ekipa juri lidera diretamente husi Embaixadór Japaun ba Timor-Leste, Hiroshi Minami.
Jornalista: Rafy Belo
Editór : Manuel Pinto
