DILI (TATOLI)-Prezidente CNJTL (Konsellu Nasionál Juventude Timor-Leste-sigla portugés), Maria Dadi Magno enkoraja joven timoroan sira katak tenke orgullu nu’udar timoroan, dignifika éroi sira hotu ba libertasaun nasionál, partisipa ho responsabilidade iha prosesu dezenvolvimentu nomós joven tenke iha paradigma foun.
“Mai ho paradigma foun, paradigm ne’ebé ita ida de’it atu kontra korupsaun, ida de’it atu kontra injustisa. Ita ida de’it. Ne’e duni, ita mak autór ba dezenvolvimentu, autór ba paz, autór ba atu halo Timor ida nabilan no di’ak liu, moris iha justisa; justisa ida ne’ebé ema hotu hanesan, justisa sosiál” dehan Prezidente Maria Dadi Magno, ba joven no estudante sira, iha salaun Universidade Orientál Timor Lorosa’e (UNITAL), Becora-Díli, kuarta ne’e.
Iha fatin hanesan, Eis-sekretáriu Estadu Juventude no Desportu (SEJD), Leovigildo Hornay reforsa mós katak rai ida ne’e atu lao ba oin, Timor ida ne’e mak ema hotu hakarak no mehi, ita sira ne’e nia liman hahú kedas hosi reitór, dosente sira no ita-nia oan sira, ita hotu nia responsabilidade.
“Imi bele hateten mai ami no ita katak se hakarak moris di’ak, moris la justu iha Timor tanba ema barak sei moris iha situasaun ida difísil, terus no susar. Tanba ne’e, ita hothotu tenke hamutuk halo filleira ne’e metin liután, forte liután atu luta,mas luta ho matenek, ho paz no ho responsablidade no luta ho independente,” hateten eis-SEJD Leovigildo Hornay perante joven, estudante sira.
Nia esplika, ita labele rona, labele hodi fali ema seluk nia ajenda, labele lori fali lider ida nia ajenda, labele lori fali atributu no intensaun seluk iha ita-nia luta. Só ita kaer ida ne’e, hanesan prezidente CNJTL hateten, luta ida ne’e la iha rohan, luta ida ne’e sei fó frutu (fuan), sei fó mensajen ida ne’ebé furak, ai-horis ne’ebé furak no sei fó ai-funan ida ne’ebé matak.
“Hanesan ita-nia prezidente hateten, ita eziji mak ida ne’e, ita-nia fuan moos, hakarak duni ita-nia oan sira atu liberta sira-nia aan, pelomenus sira mós tratamentu hanesan ho ema ruma iha rai ida ne’e nia oan sira,” dehan Eis-SEJD, Leovigildo Hornay.
Ba joven sira, eis-governante ne’e fó hanoin katak joven extraordináriu no potente mak joven ne’ebé ho hakarak, ho kapasidade rasik, ho fuan, patriotizmu, nasionalizmu hakarak kontribui la’ós tan priviléjiu, osan no poder. Labele monu ba buat tolu ne’e.
“Ne’e ha’u-nia mensajen ida, ba ha’u-nia kolega ativista sira, ha’u-nia belun voluntári sira no liliu ha’u-nia oan sira, inan-aman sira, ita fó liman ba malu. Ha’u mós bele husu tulun ba prezidente CNJTL, bele halo parseria besik liután ba grupu (joventude) tanba imi-nia natureza hanesan, ha’u la fó orden, karik imi servisu hamutuk imi sei muda Timor,” sujere Leovigildo Hornay.
Matenek Tenke Fahe
Reitór UNITAL, Florindo Pereira, iha biban hanesan, hateten katak joven bainhira matenek tenke fahe ba ema hotu atu sai matenek, serbisu no servi ho matenek no servi mós ho morál.
Akadémiku UNITAL ne’e akresenta katak joven ne’e iha joven pasadu, joven prezente nomós joven futuru nian. “Iha nasaun ne’ebé de’it, joven mak motor. Joven ne’e mak atu dezenvolve nasaun ne’ebé iha. Futuru nasaun iha joven sira-nia liman,” konklui Reitór Florindo Pereira.
Jornalista: Rafy Belo
Editór : Manuel Pinto
