DILI, (TATOLI) – Diresaun Nasionál Rejistu no Notariadu (DNRN), Ministériu Justisa rekolla ona milliaun ida resin ba kofre Estadu liuhosi atividade emisaun pasaporte durante tinan 2018.
“Iha 2018 hosi janeiru to’o dezembru ita konsege hatama reseita ba Estadu ne’e milliaun $1.689 (um milliaun, seis centos, oitenta nove mill dollar)”, dehan Diretór DNRN, João Fernando Martins Borges, ba Tatoli iha Bebora, ohin.
Nia esplika taxa ne’ebé diresaun rekolla bazeia dekretu lei 52/2016 kona-ba rejime pasaporte eletróniku foun ho mós diploma konjunta entre ministériu finansa no justisa regula emisaun pasaporte ho durasaun tempu loron ida selu $100, loron tolu $75 no loron 10 $50.
Nia dehan hosi númeru emisaun, maioria sidadaun hasai pasaporte komún tuir pasaporte servisu, diplomátiku no estranjeiru ba sidadaun estranjeiru ne’ebé seidauk iha reprezentasaun iha nasaun.
Diresaun ne’e sei iha estoke kaderneta eletróniku ho padraun Organizasaun Internasionál ba Aviasaun Sivíl (ICAO-sigla inglés), to’o 2021 tanba durante 2017 to’o 2018 kompañia fornesedór fornese kaderneta hamutuk 150.000 ba governu.
Sidadaun ho idade joven 17 to’o 59 maka barak liu trata pasaporte ho objetivu estuda iha rai li’ur no mós servisu iha Korea Súl no Austrália liuhosi programa Sekretáriu Estadu Formasaun Profisionál no Empregu (SEFOPE).
Atu fó atendimentu ba sidadaun hotu ho justu hanesan maka kada loron diresaun ne’e distribui formuláriu atendimentu ba kliente hamutuk 150 fahe ba kategoria mane 60, feto 60, idade ferik-katuas 10 no labarik ki’ik 20.
Maibé Diretór ne’e dehan dala ruma fó atendimentu liu númeru ne’e, tanba haree ba nesesidade urjente hosi kliente sira.
Entretantu, kritéria atu hetan pasaporte maka tenke iha billete identidade no sertidaun moris (sertidaun RDTL) hodi justifika ninia sidadania.
Jornalista: Agapito dos Santos
Editora: Rita Almeida
