LIQUIÇÁ, 05 maiu 2019 (TATOLI)—Administradór Munisípiu Liquiçá, Domingos da Conçeição dos Santos ‘Makaro’, hateten estabelesimentu seksaun iha Liquiça preparadu ona atu komemora loron restaurasaun independénsia 20 Maiu.
“Selebrasaun ba tinan ne’e nível munisipál nian hala’o iha Suku Vatuboro, Maubara. Orsamentu prevé tiha ona mai munisípiu hamutuk mil $5. Ne’e katak munisípiu ida-idak iha nia osan rasik ona,” administradór ne’e ko’alia liuhusi reuniaun kona-ba preparasaun ba loron restaurasaun independénsia iha Koni, Liquiçá, domingu (5/5).
Hosi orsamentu rihun-lima ne’e, nia esplika, kada postu administrativu hetan rihun-ida. Liquiçá iha postu administrativu tolu hanesan Liquiçá Vila, Bazartete no Maubara.
Administradór ne’e esplika, razaun komemora iha Vatuboro, tanba hakarak povu sai na’in ba selebrasaun ba loron proklamasaun ne’e.
Nia haktuir, kada tinan selebra loron boot iha nível munisipál, instituisaun governu mak sempre hola parte, maibé komunidade nia partisipasaun menus tebes, entaun buka meiu oinsá lori selebrasaun ne’e hakbesik ba povu.
Iha fatin hanesan, Administradór Postu Administrativu Liquiçá Vila, Rogério dos Santos, dehan oras ne’e preparasaun la’o ona.
“Preokupasaun ami-nian hanesan ne’e, postu Liquiçá tinan-tinan ita hasa’e bandeira iha kampu boot, maibé e Liquiçá Vila nian selebra iha suku balun iha foho, oinsá ho kampu boot Liquiçá nian (sentrál). Ida ne’e mak ami sei tetu hela maibé nível munisipál loos ona, katak sei selebra iha Maubara,” nia tenik.
Nia hatutan, posibilidade Liquiçá Vila nian sei selebra iha Suku Dato ka Loidahar no tinan oin selebra iha suku seluk iha Liquiçá Vila nian.
Administradór postu ne’e rekoñese bainhira kampu sentrál Liquiçá Vila nian husik mamuk, sei hetan krítika barak hosi públiku.
Entretantu, reprezentante Veteranu Munisípiu Liquiçá, Gregório dos Santos Ble Hitu, husu governu involve povu iha selebrasaun ne’e.
“Loron 20 Maiu ne’e loron ne’ebé importante. Tanba ne’e, ita-nia governu tenke halo sosializasaun ba ita-nia joven sira, nune’e joven sira bele hatene istória ne’e ho loloos,” veteranu ne’e haklaken.
Nia husu governu lokál atu mobiliza povu hodi partisipa másimu iha selebrasaun ne’e. “Ami veteranu nia hanoin ne’e, governu tenke lori selebrasaun to’o suku, tanba loron ne’e mak determina destinu Timor nian,” nia katak.
Jornalista: Evaristo Soares Martins
Editór: Xisto Freitas
