Janeiru-Maiu, DNTPSC Rekolla Reseita Millaun US$1.5

DILI, 08 maiu 2019 (TATOLI)- Durante fulan haat nia laran, hahú hosi janeiru to’o maiu, tinan ne’e, Diresaun Nasional Terra Propriedade no Servisu Kadastru (DNTPSC-sigla portugés), Ministériu Justisa, rekolla reseita ho montante millaun US$1.5 hosi arrendamentu rai no uma estadu ne’ebé sidadaun rihun 4.800 okupa hela.
DNTPSC ninia publikasaun ne’e bazeia ba relatóriu pagamentu iha Banku Nasionál Ultra Marinho (BNU) Sukursál Dili, Timor-Leste.
Diretór Nasionál DNTPSC, Hóracio da Silva, garante iha 2019 sei kobra reseita barak liu hosi tinan 2018 ne’ebé kobra millaun US$ 3.2 hosi atividade hanesan.
“Iha tinan kotuk ita kobra reseita hamutuk millaun US$ 3.2 no tinan ne’e, ita sei haka’as aan sei liu 2018 nian tanba fulan haat nian ita hetan ona millaun US$1.5”, informa Hóracio da Silva, ba Ajénsia TATOLI, ohin, iha Bebora, Dili.
Tipu arrendamentu tolu maka governu aplika ba ninia kliente ka sidadaun sira hanesan okupa uma estadu kada fulan selu arrendamentu hosi US$10 to’o US$20-resin.
Uza hodi halo atividade negósiu ki’ik no investimentu boot aplika arrendamentu bazeia ba rendimentu ne’ebé kliente sira hetan kada fulan.
Uza rai estadu ka uma estadu iha zona prinsipál ka zona da-uluk sira hodi halo negósiu ka investimentu hanesan Colmera, Audian, Fatuhada, Tasi ibun, Comoro, Kampung Baru no seluk tan tenke selu arrendamentu rai kada metru kúbiku ka meter persegiUS$ 1.00 ba sidadaun timoroan no ema estranjeiru US$1.80.
Zona da -ruak kobre iha área Bairru Pite, Mascarinas, Bemori no zona da- tolu maka kobre iha área rai hun hanesan Manleu, Fatumeta, Balide, Becora valor arrendamentu menus hosi US$1.00 kada metru (m2).
Bainhira sidadaun la kumpre selu arrendamentu ba estadu sei aplika multa ho porsentu 50 hosi total arrendamentu ne’ebé aplika ba kliente kada fulan.
Ezemplu kada fulan selu arrendamentu ba estadu US$1000 tinan ida hamutuk $ 12.000 entaun aumenta porsentu 50 tenke selu US$18.000.
Diresaun oras ne’e notifika ona sidadaun timoroan hamutuk 52 maka durante ne’e la selu arrendamentu rai ba kofre estadu.
Kobransa ba arrendamentu rai no propriedade estadu ne’e bazeia ba Lei númeru 1/2003 no dekretu Lei nú19/2004.
Jornalista: Agapito dos Santos
Editór: Francisco Simões

