LOIDAHAR, 20 maiu 2019 (TATOLI)—Xefe Suku Assumano, Postu Administrativu Liquiçá Vila, Munisípiu Liquiçá, Bernardinho Martins, husu governu atu halo balansu dezenvolvimentu entre urbana ho rurál.
“Se bele tenke halo tratamentu hanesan entre povu urbana povu área remota (rurál). Dala barak dezenvolvimentu iha kapitál de’it. Ita halo tratamentu iha suku balun la’o di’ak—iha bee, iha dalan, iha ahi, maibé suku balun nein ida. Ne’e tratamentu la hanesan,” Bernardinho ba Agência TATOLI, hafoin partisipa iha selebrasaun loron Restaurasaun Independénsia ba dala-17 iha sede Suku Loidahar, Liquiçá Vila, segunda ne’e.
Nia dehan, ko’alia kona-ba dezenvolvimentu tenke tau aas liu povu iha área rurál, tanba ne’e governu presiza fó prioridade ba área rurál basá hasoru difikuldade barak tebes.
Líder Komunitariu ne’e tenik, labele uza moto ida kada tinan lima halo promesa ba povu, maibé kaer tiha ukun haluha tiha promesa sira ne’e.
“Loloos ne’e kada ministériu, liliu Ministériu Obra Públika tenke buka hatene problema saida mak suku infrenta. La’ós husu fali ba líder komunitáriu kona-ba problema ne’ebé suku infrenta,” Bernadinho esklarese.
“Ministériu Obra Públika tenke buka hatene dalan hira mak iha territóriu nasionál ne’e ladi’ak no suku hira mak ahi laiha, eskola hira mak ladi’ak, no estabilidade suku ne’e oinsá,” líder komunitáriu ne’e hatutan.
Jornalista: Evaristo Soares Martins
Editór: Xisto Freitas
