DILI, 17 jullu 2019 (TATOLI)-Departamentu Inglés, Universidade Dili (UNDIL) prontu atu kompete hikas hafoin iha 2017 la hetan akreditasaun husi ANAAA (Ajénsia Nasionál ba Avaliasaun no Akreditasaun Akadémika-sigla portugés) tanba dosente sira ne´ebé hanorin sei lisensiadu (S1) tanba ne´e durante tinan rua labele simu estudante foun no halo graduasaun, mezmu institusionalmente UNDIL hetan ona akreditasaun hamutuk ho ensinu superiór públiku no privadu 10 seluk.
“Ami rekoñese kuandu 2017 ANAAA avalia kursu ingglés iha UNDIL, departamentu ne’e labele hetan duni akreditasaun tanba dosente sira ne’ebé hanorin maioria S1 (lisensiadu) de’it maibé agora UNDIL kontinua fali kursu Inglés no prontu atu kompete,” garante vise-reitór I UNDIL, Francisco Martins, iha Kampus UNDIL, Mascarenhas, Dili, kuarta (17/07/2019).
Vise-reitór I, UNDIL, Francisco Martins apresia padraun ne´ebé ANAAA halo ba instituisaun privada no publiku 11 inklui ne´e tanba konsidera nu´udar meius ida atu hatene kondisaun universidade nian hodi hadi´a no hasa’e liután kualidade.
“Ita tenke haree pontu pozitivu tanba ANAAA la´ós atu halo julgamentu ba universidade sira la´o ou lae, maibé nu´udar teste ida atu hatene kondisaun universidade sira iha Timór ne’e oinsa para universidade sira bele hatene di´ak liután sira nia aan,” hateten Vise-reitór, Francisco Martins iha Kampus UNDIL, Mascarenhas, kuarta (17/07/2019).
Akadémiku ne´e akresenta, ANAAA ezerse padraun ne’e di´ak tebes tanba bele dudu liután universidade privadu no publiku atu hadi´a kualidade. Maibeé, etapa sira ne’ebé mak ANAAA halo daudaun ne’e foin mak faze dahuluk.
Nia afirma katak tinan rua sira prepara aan hodi hadi´a rekursu universidade nian no agora dosente sira kuaze iha nível mestradu hotu. “Portantu iha kursu Inglés doutór ida mak sei orienta. Tan ne’e, UNDIL prontu atu hasoru avaliasaun husi ANAAA.
Notísia relevante: http://www.undil.tl/
http://www.tatoli.tl/2019/07/anaaa-sei-akredita-tan-institutu-foun-tolu/
Jornalista : Tomé Amado
Editór : Rafy Belo
