DILI, 26 jullu 2019 (TATOLI)–Prezidente Repúblika (PR), Francisco Guterres Lú Olo prezide Reuniaun Konsellu Estadu iha Palásiu Prezidente Nicolau Lobato, Bairru Pité, maibé rezultadu reuniaun ne’e la fó sai ba públiku.
Hafoin reuniaun nível altu ne’e ramata, Prezidente Parlamentu Nasionál (PPN), Arão Noé de Jesus da Costa Amaral rejeita fó informasaun tanba bazeia ba lei interna Konsellu Estadu, rezultadu reuniaun ne’e labele fó sai ba públiku.
“Ami-nia lei interna mak ne’e ona. Labele ko’alia sai ba públiku,” tenik Arão bainhira ramata reuniaun, sesta ne’e. Reuniaun ne’e hahú hosi tuku 09:30 no ramata tuku 14:30 otl.
Maski nune’e, eis Prezidente Repúblika, Kay Rala Xanana Gusmão la marka prezensa iha reuniaun refere.
Tuir informasaun husi Palásiu Prezidensiál katak, PR konvoka reuniaun Konsellu Estadu hodi rona membru sira nia opiniaun kona-ba Rejiaun Administrativa Espesiál Oé-cusse Ambeno no regula funsionamentu Orgaun Soberania sira tanba iha relasaun ba malu.
Konsellu Estadu nu’udar orgaun konsulta polítika Prezidente Repúblika nian atu rona hanoin sira husi ninian membru molok foti desizaun importante ba vida nasaun nian.
Kompozisaun membru Konsellu Estadu maka Prezidente Repúblika, Francisco Guterres Lú Olo, eis Prezidente Repúblika, Kay Rala Xanana Gusmão, eis Prezidente Repúblika, José Ramos Horta, Primeiru-Ministru, Taur Matan Ruak.
Membru seluk nomeadu hosi Parlamentu Nasionál mak hanesan Prezidente Parlamentu Nasionál, Arão Noé de Jesus da Costa Amaral, Eduardo de Deus Barreto ‘Dusae’, Aurora Ximenes, José Cornélio Guterres, Arcângelo de Jesus Gouveia Leite, José dos Santos ‘Naimori Bucar’ no membru sira nomeadu hosi Prezidente Repúblika maka hanesan Oscar Lima, Faustinho Godinho Gonçalves da Costa, Alcino de Araújo Barris, Maria Dadi Soares Magno no Laura Soares Abrantes.
Tuir Konstituisaun RDTL artigu 90 kona-ba Konsellu Estadu hateten katak Konsellu Estadu mak órgaun konsulta polítiku PR ne’ebé nia rasik prezide no hola parte iha Konsellu Estadu mak eis Prezidente Repúblika sira ne’ebé la’ós destituídu, Prezidente Parlamentu Nasionál, Primeiru-Ministru, sidadaun lima ne’ebé PN hili ho armónia tuir prinsípiu reprezentasaun proporsionál, ba períudu tuir durasaun lejizlatura nian, ne’ebé la’ós membru hosi órgaun soberania nian.
Hatutan mós katak sidadaun lima ne’ebé PR foti, la’ós membru hosi órgaun soberania nian, ba periudu ne’ebé hanesan ho durasaun tempu ukun Xefe Estadu nian.
Entretantu, iha artigu 91 ko’alia kona-ba kompeténsia, organizasaun no funsionamentu Konsellu Estadu nian, katak Konsellu Estadu maka bele fó sai kona-ba disolusaun Parlamentu Nasionál (PN) no fó sai kona-ba demisaun Governu nian.
Nune’e mós fó sai kona-ba deklarasaun funu no oinsá atu hala’o dame, fó sai kona-ba kazu seluk tan ne’ebé iha Lei Inan no iha jerál, hato’o konsellu ba PR bainhira nia hala’o ninia kna’ar, no bainhira nia husu, nune’e mós halo ninia rejimentu internu.
Ikus liu reuniaun Konsellu Estadu nian la’ós ba públiku no lei mak defini Konsellu Estadu nia organizasaun no funsionamentu.
Jornalista: Hortençio Sanchez
Editór: Xisto Freitas
