DILI, 29 jullu 2019 (TATOLI)—Prezidente Tribunál Rekursu (PTR), Deolindo dos Santos, hateten nia parte hato’o ona pedidu ba Governu liuhosi Ministériu Justisa nune’e iha tempu besik bele aumenta tan juiz atu bele atende serbisu iha Tribunál di’ak liu no lais.
“Ha’u hato’o ba pedidu ba Ministru Justisa bainhira rekruta tan juiz ruma karik mínimu ne’e tenke sanulu tan ka bele liu-tan hosi ne’e. Governu hili tenke haree ema hirak ne’ebé kualidade di’ak. Ita atu fó justisa di’ak ba povu tenke ema mós kualidade mak serbisu iha ne’ebá,” dehan PTR ba jornalista sira hafoin ramata soru-mutu ho Prezidente Repúblika (PR), Francisco Guterres Lú Olo, iha Palásiu Prezidente Nicolau Lobato, Bairru Pite, ohin.
“Atu halo jestaun ne’e presiza involve sé, tenke involve dirijente sira Tribunál nian. Ha’u rasik ho Konsellu Majistratura Judisiál, juiz superiór no juiz sira hotu nune’e bele halo jestaun ida di’ak liu. Ida ne’e mak ita presiza tan rekursu. Hanesan ita hotu hatene, agora dadaun, juiz tolunulu resin tolu ne’e distribui ba Timor laran tomak, na’in lima iha Tribunál Rekursu no ruanulu resin ualu iha Primeira Instánsia (Tribunál Distritál) entaun serbisu barak demais ita presiza tan juiz,” nia hatutan.
Bainhira Governu aprova pedidu ne’ebé Tribunál Rekursu submete, nia esplika, juiz hirak ne’e barak liu sei hala’o kna’ar iha Tribunál Dili tanba kazu númeru boot liu kompara ho Covalima, Oé-Cuse no Baucau.
Jornalista: Hortençio Sanchez
Editór: Xisto Freitas
