DILI, 02 agostu 2019 (TATOLI)- Ministériu Ensinu Superiór Siénsia Kultura (MESSK) oras ne’e daudaun prepara ona atividade ualu atu komemora loron Mundiál Siénsia no loron Nasionál Ensinu Superiór ne’ebé sei realiza iha fulan novembru tinan ne’e. Tan ne’e, Diretora Jerál (DJ) MESSK, Maria Fernanda Lay propoen orsamentu rihun 10 ba Dirasaun Finansa atu alkansa programa sira ne’e.
Diretora Jerál MESSK ne’e informa katak orsamentu adisionál rihun 17,500 ne’ebé iha ona la sufisiente atu alkansa atividade importante sira ne’ebé trasa ona. Tan ne’e ninia parte propoin tan rihun 10 hodi bele asegura di´ak liután eventu sira ne’e.
“Ita sei realiza tan enkontru ikus iha loron 8 semana ne’e ho Ministru Ensinu Superiór Siénsia no Kultura atu haree liután parte téknika nian inklui aprejenta mós orsamentu rihun 10 ba Ministru hodi toma konsiderasaun,” tenik Diretora Jerál, Maria Fernanda Lay ba jornalista Ajénia TATOLI iha ninia gabineti, MESSK, Colmera, sesta (02/08/2019).
Nia hatutan, programa sira ne’ebé mak trasa ona atu komemora eventu importante rua ne’e mak hanesan diskursu siéntifiku, jogu Ensinu Superiór Cup (kopa), akampamentu, espozisaun, limpeza jerál, talkshow, semináriu Sientífiku no ikus liu taka ho misa. Portantu, atividade sira ne’e sei hahú husi loron 4-17 novembru 2019.
Diretora Maria Fernanda informa katak ninia parte antes ne’e realiza ona sorumutu dala haat hamutuk ho Komisaun Organizadora inklui Ministru rasik hodi diskuti kle´an liután atividade sira ne’e no buat hotu planeia hotu ona. Portantu sorumutu ikus liu ho Ministru sei realija fali iha loron 8 semana ne’e hodi hatur didi´ak programa sira ne’e tuir ninia dalan.
Entertantu, programa ka eventu importante sira ne’e hetan envolvimentu másimu husi instituisaun estadu ka publiku inklui privadu sira hotu hodi sai mós nu´udar Komisaun Organizadora (KO).
Jornalista : Tomé Amado
Editór : Rafy Belo
