DILI, 04 jullu 2019 (TATOLI)-Governu Timor-Leste liuhusi Ministru Negósiu Estranjéiru no Kooperasaun, Dionísio Babo Soares, partisipa iha Dialógu Sudoeste Pasífiku ba dala 17, iha loron 1 fulan Agustu 2019 iha ámbitu enkontru Ministru Negósiu Estranjeiru ASEAN ba dála 52 iha Bankok, Tailándia.
“Dialógu ne´e nu´udar fórum ida ba membrus neen: Austrália, Filipina, Papua Nova Guiné, Nova Zelándia, no Timor-Leste hodi fahe hanoin kona-ba asuntu oioin ne´ebé sai preukupasaun komúm. Enkontru refere prezide husi Sekretáriu Estadu Negósiu Estranjeiru Filipina, Teodoro L. Locsin, Jr,” haktuir komunikadu MNEK ba Ajénsia TATOLI, domingu (04/08/2019).
Partisipa iha enkontru né mak Ministra Negosíu Estranjéiru Indonezia, Retno L.P Marsudi, Ministru Negósiu Estranjéiru Nova Zelándia, Winston Peters, Ministru Negósiu Estranjeiru no Kooperasaun, Dionísio Babo Soares, Ajuntu Sekretáriu Estadu Negósiu Estranjeiru no Komérsiu Austrália ba grupu Indo-Pasífiku, Richard Maude, no Enviadu Espesiál no Embaixada PNG (Papua Nova Guiné) iha Indonézia, reprezenta husi Enkaregadu Negósiu, Frank Mizigi.
“Enkontru ne´e foka atensaun ba kooperasaun no seguransa marítima rejionál, inklui biodiversidade mariñu, protesaun ámbientál, inter-konetividade, síber seguransa; jestaun risku dezastre,” refere komunikadu ne´e.
Iha komunikadu ne´e mós haktuir, ministru sira rekuñese nesesidade atu máximiza oportunidade ba kooperasaun boot liu iha sub-rejiaun ne´e nia laran, no konkorda atu halo esforsu koordenadu hodi kombate efeitu estragu husi mudansa klimátika iha rejiaun ne´e, aumenta nível tasi, akontesementu klima boot tebes iha tinan hirak ne´e.
Sira kompriende importánsia husi uzu rekursu peska no mariñu ho sustentável, no nesesidade atu fahe informasaun regularmente kona-ba asuntu máriñu, no fahe hanoin kona-ba avansu konetividade rejionál liuhusi projetu potensíal ba dezenvolvimentu iha transporte, negósiu, enerjia, ligasaun ICT, hodi suporta kresimentu ekonómia inklusiva.
Jornalista : Rafy Belo
Editór : Francisco Simões
