DILI, 5 agustu 2019 (TATOLI)—Tuir planu, hahú hosi 1-15 setembru 2019, Tribunál sira ho Ministériu Públiku sei hala’o féria judisiária.
Tanba ne’e, Prokuradór Jerál Repúblika (PJR), José da Costa Ximenes informa asuntu ne’e ba Prezidente Repúblika, Francisco Guterres Lú Olo Iha Palásiu Prezidente Nicolau Lobato, Bairru Pité, Dili, segunda ne’e.
Hafoin enkontru, Prokuradór Jerál haktuir, durante féria judisiál, Ministériu Públiku no Tribunál sira sei funsiona de’it mak kazu urjente sira mak hanesan primeiru interrogatóriu ba primeiru detidu sira no mós julgamentu sumáriu.
Tuir planu, atividade sira sei normaliza hikas hafoin féria judisiál. Kona-ba asuntu ne’e, Ximenes hateten, Prezidente Repúblika husu atu apezár féria judisiál, maibé keta haluha katak serbisu estadu ninian tenke funsiona nafatin no interese estadu tenke tau aas liu.
Iha oportunidade ne’e, José Ximenes informa mós ba Xefe Estadu kona-ba relatóriu anuál tinan 2018, ne’ebé nia aprezenta ona ba Parlamentu Nasionál.
Aleinde ne’e, atualiza mós kazu sunu uma no oho ema iha Leorema, Liquicá, ne’ebé oras ne’e kaptura ona ema na’in 12, iha ne’ebé na’in 11 iha prizaun preventiva no na’in ida halo hela aprezentasaun periódika.
Kona-ba kazu taa membru F-FDTL, Ximenes esplika, na’in ida tama prizaun preventiva no sira seluk halo aprezentasaun periódika.
Jornalista: Cipriano Colo
Editór: Xisto Freitas
