DILI, 6 agostu 2019 (TATOLI)-Dosente Universidade Nasionál Timor Lorosa’e (UNTL) na’in neen oras ne’e daudaun sei hala’o sira-nia estudu iha Universidade Mahidol Tailándia hodi hasai kursu mestradu atu bele apoiu Departamentu Direitu Umanu iha UNTL.
“UNTL iha obrigasaun atu fasilita formasaun ba ninia rekursu sira atu nune’e bele iha koñesimentu di’ak liu tan oinsá atu fó apoiu ba estadu hodi ajuda halo relatóriu ba Nasaun Unida,” hateten Diretór Sentru Estudu ba Dame, Antero Benedito da Silva ba jornalista TATOLI iha edifísiu Sentru ba Dame, tersa (06/08/2019).
Akadémiku ne’e hateten, Departamentu Direitu Umanu ne’e estabelese tanba haree ba partisipasaun Timor-Leste nian liuhusi prosesu ratifikasaun tratadu direitu umanu.
Nia mós haktuir, antes ne’e ninia parte iha mehi boot atu hari Departamentu Direitu umanu ne’e hamutuk ho Sentru ba Dame maibé sira husi Globál Kampus deside katak di’ak liu instituisaun ne’e separa de’it maibé kontinua serbisu hamutuk,
“Ita hatene katak departamentu ne’e foin hahú maibé ninia atividade kontinua la’o nafatin tanba hetan apoiu husi embaixadór Uniaun Europeia, magnífiku reitór inklui eis-prezidente José Ramos Horta,” tenik akadémiku UNTL ne’e.
Entretantu, departamentu ne’e estabelese ho apoiu husi Uniaun Europeia iha 2018 liuhusi subvensaun direta ho valór euro 425 (kuaze dolár rihun 485).
Notísia relevante:União Europeia no Sosiedade Sívil Timor-Leste Asina Kontratu Reforsa Projetu Haat
Jornalista :Tomé Amado
Editór : Rafy Belo
