DILI, 06 agostu 2019 (TATOLI)-Timor-Leste partisipa ona mós iha eventu ASEAN Regional Forum (ARF) ba dala 26, iha Bankók, Tailándia, foin lalais ne’e. Iha eventu ne’e, Timor-Leste liuhusi Ministériu Negósiu Estranjeiru no Kooperasaun (MNEK) hetan oportunidade halo intervensaun kona-ba situasaun polítika no seguransa atuál Timor-Leste nian.
“Hanesan eventu Asean Regional Forum ne’e eventu ida ne’ebé país sira iha ASEAN ne’e hamutuk ho parseiru sira ne’e inklui Amérika, Xina, Canada, Austrália, Inglaterra, país iha ASEAN sira seluk ne’e hotu hamutuk 27 ou 28 países sira. Enkontru ne’e nia sentralizadu ne’e iha ASEAN, hanesan pontu sentrál atu koordena kestaun ne’ebé mak iha relasaun ho seguransa, defeza, ne’ebé sai interese iha nivel multilaterál hosi ARF,” haktuir Ministru Negósiu Estranjeiru no Kooperasaun (MNEK), Dionísio Babo Soares ba Ajénsia TATOLI iha Ministériu Finansas Ai-tarak Laran, tersa (06/8/2019).
Ministru Dionísio Babo haktuir, iha eventu ARF ne’ebé realiza iha Tailándia sira ko’alia kestaun seguransa. Iha kestaun ne’e, la’ós ko’alia kestaun seguransa funu de’it maibé mós kona-ba ameasa sira hanesan krime transnasionál.
“Krime transnasionál kona-ba narkótika, ilegal traffic (tráfiku ilegál), human traffic (tráfiku umanu), krime organizadu, halo husi país ba países sira seluk inklui mós operasaun ameasa seguransa marítima nian, inklui mós krime sira bolu cybercrime (krime sibernétika) ho krime media nian, hanesan eletrónika sira ne’e,” nia haktuir.
Ministru informa tan, krime ne’ebé iha relasaun ka karakterístika bele ameasa ASEAN hamutuk ho parseiru sira iha ASEAN tanba ne’e tenke iha serbisu hamutuk atu haree para depois bele iha rezolusaun ba kazu sira ne’e.
“Ha’u fó ezemplu konkretu hanesan, konflitu kona-ba South Xina Sea, kona-ba Tasi Súl Xina disputa hamutuk ho país lubuk ida ne’e, iha ne’ebá ami ko’alia oinsá mak rezolve kazu ida ne’e, Timor hanoin katak kompete South Xina Sea, ita esperiénsia ita rezolve ita-nia problema ho Austrália, ne’ebé ita hakarak sira atu servisu hamutuk sira atu uza pas, labele kria fali kompetisaun militár iha ne’ebá, maibé hosi fatin ne’e hanesan fatin paizajen nian, roo sira livremente para iha kooperasaun ekonomia,” nia informa.
Ministru Dionísio Babo informa tan katak, kona-ba Peninsula Korea nian, ne’ebé Korea Norte no Korea Súl tensaun hela de’it. “Saída mak presiza halo, depois ema balun ko’alia kona-ba kazu Rohina nian, iha Myanmar, pois haree mós ba grupu-grupu reveldes sira ne’ebé iha ASEAN nian, liuliu iha Myanmar, Filipinas, halo nusa mak halo aprosimasaun sira ne’e, para ba rezolve kestaun sira ne’e”.
“Iha pontu ida fali mós, ko’alia kona-ba ameasa ilegal fishing( peska ilegál), iha Timor mós iha, iha país besik ASEAN mós parte ba sorin mós iha, iha India mós iha, haree mós ba kestaun sira ne’ebé ameasa ambiente nian, hanesan agora tasi komesa sa’e tanba es (jelu) sira nakfera iha Polu Norte, nia halo tasi sa’e entaun illa sira ki’ik ne’e balu komesa mout daudauk ona, inklui mós ita, ne’ebé impaktu ambientál mak sai ameasa ba seguransa ba nasaun sira ida-idak. Entaun, ida ne’e mak sai hanesan pontu referénsia ne’ebé ami adopta iha ne’ebá, no iha ami-nia intervensaun ne’e ita mensiona buat sira ne’e hotu kedas”.
“País sira ha’u hanoin katak tenke buka serbisu hamutuk para bele buka rezolusaun ba kestaun ba sira ne’e hotu,” garante Ministru Dionísio Babo.
Notísia relevante:MNEK Hato´o Intervensaun Kona-ba Situasaun Polítika No Seguransa TL Iha Tailándia
Jornalista : Nelia Fernandes
Editór : Rafy Belo
